Mitsubishi prezanton nëndeten e shtatë sulmuese japoneze të klasit “Taigei”

Mitsubishi Heavy Industries ka nxjerrë në ujë nëndeten e shtatë sulmuese me motor dizel-elektrik të klasit “Taigei” për Forcën Detare të Vetëmbrojtjes së Japonisë, në kantierin e saj detar në Kobe, Prefektura Hyōgo.

E pagëzuar me emrin JS Shōgei (SS-519), kjo anije do t’i bashkohet një flotë prej 10 njësish që pasojnë nëndetet e klasit “Sōryū”, të cilat kanë qenë në shërbim që nga fillimi i viteve 2000.

Ministri i Mbrojtjes, Shinjiro Koizumi, e zgjodhi emrin e anijes – që përkthehet si “balenë që fluturon lart” – nga propozimet e paraqitura prej njësive ushtarake.

Pas prezantimit të saj, Mitsubishi do të vazhdojë punën për pajisjen e trupit të nëndetëses, motorëve, sistemeve elektrike dhe armatimit.

Tokio pritet ta marrë mjetin lundrues brenda vitit 2027.

Nëndetësja Taigei

Dizajni “Taigei” i Mitsubishi-t përdor bateri litium-jon për të zgjatur kohën e qëndrimit nën ujë dhe për të përmirësuar fshehtësinë akustike, duke shfrytëzuar gjithashtu aftësi të përmirësuara sonari dhe teknika për reduktimin e zhurmës strukturore, me qëllim minimizimin e gjurmëve akustike.

Nëndetësja është ndërtuar me një trup 84 metra të gjatë dhe gjerësi 9 metra. Ajo mund të strehojë deri në 40 persona dhe përfshin ambiente të dedikuara banimi për anëtaret femra të ekuipazhit.

Taigei lëviz me një shpejtësi deri në 20 nyje (37 km/orë), duke përdorur dy motorë dizel Kawasaki me një fuqi totale prej 6.000 kuaj-fuqi.

Për sa i përket fuqisë goditëse, mjeti mund të lëshojë torpedo të rënda të llojeve të ndryshme, raketa “sipërfaqe-sipërfaqe”, si dhe predhën rrëshqitëse me shpejtësi tepër të lartë (*Hyper Velocity Gliding Projectile*), e cila po zhvillohet si pjesë e arsenalit balistik të Japonisë.

Fraksion.com