Adoleshentit iu shkëput dora gjatë protestave, Franca pezullon përdorimin e granatave trullosëse

Franca ka pezulluar përdorimin e granatave tronditëse (stun grenades) gjatë menaxhimit të protestave studentore që kanë përfshirë vendin, pasi një 15-vjeçari iu shkëput dora në fillim të kësaj jave.

Ministri i Brendshëm, Laurent Nuñez, deklaroi se kishte kërkuar këtë pezullim derisa të sqaroheshin faktet e incidentit të së hënës në Lens, pasi versionet e dhëna nga protestuesit dhe autoritetet ishin kontradiktore.

Disa grupe janë ankuar se policia ka përdorur forcë joproporcionale ndaj adoleshentëve.

Trazirat vazhduan edhe të mërkurën, me më shumë se 500 shkolla të mbyllura plotësisht ose pjesërisht, ndërsa ministri Sébastien Lecornu pritet të flasë për protestat në shkolla gjatë një deklarate në mbrëmje.

Qindra mijëra njerëz dolën në rrugë të martën për të kërkuar kushte më të mira shkollore; në disa qytete u përdorën gaz lotsjellës dhe topa uji. Ministria e Brendshme njoftoi se u arrestuan 488 persona dhe u plagosën 43 pjesëtarë të forcave të sigurisë.

Nuñez i tha radios franceze RTL se organi mbikëqyrës i policisë, IGPN, ka nisur 18 hetime për të përcaktuar nëse policët kanë vepruar në mënyrë “proporcionale” gjatë demonstratave, të cilat janë përhapur nga nxënësit e shkollave të mesme te prindërit e tyre, studentët universitarë dhe sindikatat.

“Ka një veprim të policisë që ngre pikëpyetje për të gjithë ne brenda Ministrisë së Brendshme; bëhet fjalë për atë që ndodhi në Lens,” tha ai, duke konfirmuar se përdorimi i granatave tronditëse po pezullohej “derisa të sqarohen faktet rreth këtij rasti”.

Dora e 15-vjeçarit u shkëput pasi një granatë e ashtuquajtur “kundër rrethimit” (anti-encirclement grenade) u hodh në rrethana të paqarta pranë shkollës së mesme “Auguste Béhal”, në qytetin verior pranë Lilit.

Autoritetet kanë deklaruar se ai e mori granatën në dorë dhe ajo shpërtheu, por nxënësit pretendojnë se ai u godit drejtpërdrejt pasi një polic e hodhi atë.

Sipas prefektit lokal, incidenti ndodhi kur policia u përball me një grup prej 200-250 nxënësish që hidhnin gurë dhe mjete piroteknike.

Granata tronditëse konsiderohet si armë jolehtale, por lëshon kokrriza të vogla gome kur shpërthen. “Kur ka dyshime për përdorim të forcës joproporcionale, gjithmonë zhvillohen hetime gjyqësore,” tha Nuñez, duke pohuar se qeveria ishte “këtu për të mbrojtur nxënësit e shkollave të mesme”.

Shqetësimet janë shtuar gjithashtu nga rasti i një 14-vjeçari, i cili u godit në fytyrë nga një granatë lotsjellëse javën e kaluar. Avokati i djalit tha se ai kishte humbur disa dhëmbë dhe kishte pësuar thyerje të nofullës gjatë incidentit në Saint-Ouen-l’Aumône, në veriperëndim të Parisit, dhe se një oficer policie është vënë nën akuzë.

Ndërkohë, prokurorët njoftuan të mërkurën se ishte hapur një hetim për tentativë vrasjeje, pasi një nxënës 17-vjeçar që merrte pjesë në protesta u ankua se një oficer “ia kishte mbajtur kokën nën ujë” ndërsa përpiqej ta arrestonte pranë një lumi në qytetin verilindor të Belfort-it.

Kryeministri e ka dënuar dhunën e shfaqur në disa nga protestat që nisën në mes të shtatorit, duke vënë në dukje të martën se, që atëherë, janë lënduar 215 nxënës, 85 anëtarë të personelit dhe 715 oficerë policie.

Më shumë se 6,500 persona janë ndaluar ose arrestuar gjatë kësaj periudhe, sipas Ministrisë së Brendshme.

Presidenti Emmanuel Macron zhvilloi një takim urgjent vonë të martën me Lecornu-n dhe ministra të tjerë kyç për të gjetur një rrugëdalje nga kriza, pasi pothuajse një e katërta e të gjitha gjimnazeve u prekën nga protestat e ditës – ndërsa shifrat qeveritare e vlerësonin numrin e protestuesve në mbi 250,000.

Sindikatat e nxënësve e vlerësojnë numrin në 450,000 dhe thonë se një raund i katërt protestash është planifikuar për të enjten në Paris dhe qytete të tjera.

Kreu i sindikatës së shkollave të mesme USL, Ryad Rani, i tha radios franceze të mërkurën: “Ne po i themi zotërisë Nuñez: qetësoni oficerët tuaj të policisë dhe bëni thirrje për vetëpërmbajtje.”