Një gjykatës amerikan cakton datën e gjykimit të Maduros

Çifti ndodhet në paraburgim që nga fillimi i janarit, kur forcat amerikane hynë në Venezuelë dhe i arrestuan në shtëpinë e tyre në Karakas. Kjo bastisje pa precedent, e kryer në mes të natës, u përshëndet nga presidenti amerikan Donald Trump si një “operacion preciz i zbatimit të ligjit” si pjesë e një rasti penal të ngritur kundër çiftit gjashtë vjet më parë.

Maduro mban qëndrimin e pafajësisë, duke u përshkruar veten si rob lufte dhe duke e cilësuar arrestimin e tij si një rrëmbim. Gjyqtari Alvin Hellerstein ka caktuar 1 qershorin 2027 si datë për gjykimin e Maduros dhe gruas së tij, pas një kërkese të përbashkët nga prokuroria dhe mbrojtja.

Hellerstein gjithashtu ka caktuar një seancë tjetër më 17 nëntor për të shqyrtuar parashtresat e mbrojtjes, përfshirë një sfidë ndaj ligjshmërisë së mënyrës se si Maduro dhe Flores u kapën dhe u sollën në Shtetet e Bashkuara. “Të gjitha palët bien dakord se ky është një afat kohor realist. Ne nuk parashikojmë asnjë vonesë, por natyrisht, nëse lind ndonjë rrethanë e paparashikuar, do t’ju njoftojmë, ” i tha avokati i Maduros, Barry Pollack, gjyqtarit të mërkurën.

Maduro rrezikon burgim të përjetshëm

Prokurorët amerikanë e kanë akuzuar Maduron se  ka përdorur fuqinë e shtetit venezuelian  për të mbrojtur dhe lehtësuar trafikun e paligjshëm të drogës. Ai gjithashtu akuzohet se ka formuar aleanca me kartelet për të kontrabanduar tonelata kokainë në Shtetet e Bashkuara.

Nëse shpallen fajtorë, Maduro dhe Flores rrezikojnë burgim të përjetshëm.

Të dy morën pjesë në seancën 15-minutëshe veçmas nga tavolina e mbrojtjes, të rrethuar nga avokatët e tyre. Ata nuk folën gjatë procedurës. Megjithatë, Maduro i bëri me dorë një personi të paidentifikuar në galerinë publike ndërsa autoritetet e nxirrnin nga salla e gjyqit.

Pollack deklaroi se ekipi i tij kishte për qëllim të sfidonte aktakuzën në bazë të imunitetit sovran, duke shtuar se, nëse do të kishin sukses, Maduro nuk do të ishte më i detyruar të gjykohej.

Që nga largimi i Maduros nga detyra, Venezuela është udhëhequr nga ish-zëvendëspresidentja e tij, Delcy Rodriguez. Rodriguez ka rivendosur marrëdhëniet dypalëshe me Shtetet e Bashkuara, ndërsa Uashingtoni i ka vënë nën kontroll eksportet e naftës së Venezuelës. Në këmbim, Shtetet e Bashkuara kanë lehtësuar sanksionet ndaj industrisë së naftës së vendit, ndërsa kompanitë e huaja kanë zgjeruar projektet e tyre të naftës dhe gazit./DW