Telashe për ONE, aksionet e 4iG në pikiatë. Frikë për sekuestrimin e kompanive të lidhura me Orban

Pas deklaratave të kryeministrit të zgjedhur hungarez Magyar për hetimin e kompanive që dyshohet se përbënin kolonën e sistemit korruptiv të ngritur në Hungari nga Viktor Orban, aksionet e kompanisë 4iG kanë humbur mbi 32 për qind të vlerës së tyre brenda një muaji të vetëm.

Sipas të dhënave nga bursa hungareze, çmimi i aksioneve të 4iG ra në 2340 forint në mbylljen e bursës të hënën, nga 3400 që ishte një muaj më parë.

Kryeministri i zgjedhur Magyar ka deklaruar publikisht se qeveria do të ngrejë një zyrë të posaçme, e cila do të gjurmojë dhe konfiskojë pasuritë e grupit të ashtuquajtur NER, kompani private, që dyshohet se përbënin kolonën e sistemit korruptiv në Hungari.

Kjo është edhe arsyeja se pse aksionet e 4iG janë duke rënë në pikiatë dhe, krahasuar me pikun e tyre në fund të vitit të kaluar, çmimi i tyre ka rënë me më shumë se dy herë.

Nëse qeveria e re në Hungari do të klasifikojë edhe paratë e blerjes së One nga 4iG si të ardhura nga korrupsioni, kjo mund të hapte skenarë të tjerë për të ardhmen e One në Shqipëri.

Fraksion.com