NATO dhe Republika e Moldavisë nisin Programin e Zhvillimit Profesional për nëpunësit civilë
Të martën (28 shkurt 2023), NATO dhe Republika e Moldavisë përuruan një Program të Zhvillimit Profesional për nëpunësit civilë dhe institucionet moldave në sektorin e sigurisë dhe mbrojtjes. Veprimtaria e nisjes mblodhi së bashku zyrtarë moldavë, Zyrën Ndërlidhëse të NATO-s në Republikën e Moldavisë, vendet aleate dhe partnere të NATO-s, si dhe përfaqësues të shoqërisë civile.
Shefja e re e Zyrës Ndërlidhëse të NATO-s në Republikën e Moldavisë, Michaela Šimáková, nënvizoi se Programi përfaqëson një tjetër moment historik në partneritetin afatgjatë NATO-Republika e Moldavisë: “Unë besoj se Programi do të bëjë një ndryshim për Moldavinë. Programi drejtohet nga kërkesa dhe përshtatet për të përmbushur nevojat dhe kërkesat e autoriteteve moldave. Zyra Ndërlidhëse e NATO-s në Kishinau do të vazhdojë të mbështesë dhe lehtësojë partneritetin NATO-Moldavi, duke përfshirë ndërtimin e kapaciteteve.
Sekretari i Shtetit i Kancelarisë Shtetërore të Republikës së Moldavisë, Adrian Băluţel, tha: “Në mjedisin aktual dhe bazuar në përvojën gjatë krizave të fundit, është e domosdoshme të shikohet siguria me një perspektivë të gjerë. Ky program do të ndihmojë Moldavinë të zhvillojë kapacitetet e saj dhe të promovojë koordinimin ndërmjet institucioneve për çështjet e sigurisë.”
Objektivi i Programit të Zhvillimit Profesional NATO-Republika e Moldavisë është të rrisë zhvillimin profesional të personelit civil dhe kapaciteteve të shërbimit civil në sektorin e mbrojtjes dhe sigurisë. I krijuar në përgjigje të kërkesës së Moldavisë, Programi përfshin mundësi zhvillimi profesional si trajnime, kurse, praktika dhe vizita studimore që do t’u lejojnë përfituesve të fitojnë më shumë ekspertizë dhe përvojë praktike. Aktivitetet organizohen nga Zyra Ndërlidhëse e NATO-s në Kishinau në koordinim të ngushtë me institucionet moldave.
NATO e mbështet Programin nëpërmjet Fondit të Mirëbesimit për Ndërtimin e Kapaciteteve të Mbrojtjes, i sponsorizuar nga vendet aleate dhe partnere, duke përfshirë Çekinë, Gjermaninë, Luksemburgun, Poloninë, Sllovakinë, Mbretërinë e Bashkuar, Finlandën, Suedinë dhe Zvicrën./M.G
Fraksion.com
