Jep dorëheqjen presidenti i Paraguait, humbi mbështetjen edhe brenda partisë së tij

Presidenti i Paraguait, Santiago Peña, ka dhënë dorëheqjen pas një krize të thellë politike të shkaktuar nga falimentimi i Ueno Bank, një institucion financiar me të cilin ai kishte pasur lidhje të drejtpërdrejta.

Në një videomesazh të publikuar në rrjetet sociale, Peña kërkoi falje ndaj qytetarëve, duke deklaruar se nuk kishte pasur kurrë qëllim të tradhtonte besimin e tyre.

“Dua t’u kërkoj falje njerëzve nëse në ndonjë moment kam dështuar. Nuk ka qenë kurrë qëllimi im të tradhtoja besimin që më keni dhënë”, u shpreh ai.

Kriza shpërtheu pasi Ueno Bank hyri në procesin e paaftësisë paguese, duke pezulluar të gjitha operacionet. Situata shkaktoi reagime të forta politike, pasi ligjvënësit akuzuan presidentin për konflikt interesi dhe shkelje të detyrës. Peña kishte qenë aksioner deri vitin e kaluar në kompaninë që zotëronte bankën.

Presidenti i ka mohuar akuzat për shkelje, por presioni politik u rrit ndjeshëm pasi Dhoma e Ulët e Kongresit votoi në favor të nisjes së procedurave për shkarkimin e tij përmes një procesi hetimor dhe gjykimi parlamentar.

Banka Qendrore e Paraguait ndërhyri duke marrë nën administrim huadhënësin digjital, ndërsa qytetarë të shumtë dolën në rrugë në shenjë proteste, duke kërkuar dorëheqjen e presidentit.

Ndërkohë, është emëruar një drejtues i ri i Bankës Qendrore dhe Kongresi ka miratuar një proces për kompensimin e depozituesve që kanë humbur aksesin në paratë e tyre.

Santiago Peña u zgjodh president në vitin 2023, si përfaqësues i Partisë Konservatore Colorado, e cila është në pushtet në Paraguai. Ai fitoi zgjedhjet përballë kandidatit të qendrës së majtë.

Fraksion.com