“Nuk jemi në luftë, por nuk jemi as në paqe”, Ushtaraku i Lartë i NATO-s: Kërcënimet na vijnë nga fusha të ndryshme dhe qendra të shumta pushteti
Kryetari i Komitetit Ushtarak të NATO-s (CMC), Admirali Giuseppe Cavo Dragone, dhe Drejtori i Përgjithshëm i Shtabit Ushtarak Ndërkombëtar të NATO-s (DGIMS), Gjenerallejtënant Remigijus Baltrėnas, morën pjesë në Konferencën e 25-të të Sigurisë në Berlin (BSC), ( më 3 dhe 4 nëntor 2026) e organizuar me Lituaninë si vend partner.
Në fjalimin e tij kryesor, Admirali Giuseppe Cavo Dragone trajtoi temën e kërcënimeve shumëpolare: “Kërcënimet na vijnë përmes fushave të ndryshme dhe nga qendra të shumta pushteti, njëkohësisht dhe shpeshherë në koordinim. Nuk jemi në luftë, por sigurisht që nuk jemi as në paqe”, u shpreh Kryetari i Komitetit Ushtarak.
Gjatë debatit të nivelit të lartë me temë “Evropa dhe NATO: Së bashku më të forta”, ai theksoi përafrimin aktual të agjendave të sigurisë dhe mbrojtjes të NATO-s dhe BE-së – duke filluar nga mbrojtja kibernetike e deri te standardizimi dhe inovacioni – me fokus te plotësimi i ndërsjellë.
Në këtë kontekst, Admirali Cavo Dragone nënvizoi gjithashtu nevojën për të bashkuar forcat e secilës organizatë, duke përmendur si shembull konkret lëvizshmërinë ushtarake, e cila siguron transportin e pajisjeve dhe personelit brenda dhe nëpër Evropë.
Në kuadër të Konferencës së Sigurisë në Berlin, Gjenerallejtënant Remigijus Baltrėnas mori pjesë në një panel diskutimi me temë “Parandalimi përmes vigjilencës: Si të frenojmë ndërhyrjet ruse”.
Drejtori i Përgjithshëm i Shtabit Ushtarak Ndërkombëtar të NATO-s theksoi se qëllimi kryesor për tridhjetë e dy aleatët është të sigurojnë një kuptim të përbashkët mbi ngjarjet aktuale, në mënyrë që të mos bien pre e veprimeve çorientuese ruse. Ai gjithashtu nënvizoi se ndërtimi i qëndrueshmërisë brenda shoqërive shërben si një mjet kyç parandalues kundër veprimeve hibride. “Një aspekt kyç i kundërvënies ndaj veprimeve hibride është qëndrueshmëria e shoqërive, pasi ajo vetvetiu shërben si faktor parandalues. Prandaj, duhet të shfrytëzojmë komunikimin tonë strategjik dhe angazhimin e hapur me shoqëritë tona. Duhet të jemi shumë të drejtpërdrejtë në shpjegimin për njerëzit se ata janë pjesë e arkitekturës sonë të mbrojtjes dhe se kanë një rol për të luajtur në kundërvënien ndaj veprimeve hibride,” tha gjeneral-lejtnant Baltrėnas.
Fraksion.com
