Kompanitë gjermane rrisin ndjeshëm prodhimin

Në gusht, kompanitë gjermane e rritën prodhimin katër herë më shumë sesa pritej. Prodhimi i kombinuar nga  sektorët e industrisë, ndërtimit dhe energjisë u rrit me 2,0% krahasuar me muajin e kaluar, sipas Zyrës Federale të Statistikave. Ekonomistët e anketuar nga agjencia e lajmeve Reuters kishin parashikuar një rritje prej vetëm 0,5%. Kjo shënon rritjen më të madhe në gati një vit e gjysmë; në korrik, prodhimi kishte rënë me 1,2%.

“Pra,  ekonomia gjermane nuk ka ngecur  në baltën e niveleve të ulëta të ujit,” tha Sebastian Wanke, ekonomist në KfW (Banka Gjermane e Rindërtimit). Nivelet vazhdimisht të ulëta të ujit në Rin që nga mesi i korrikut kanë penguar transportin lumor, duke ndikuar kështu negativisht te prodhimi. Sipas vlerësimeve të Institutit të Kielit për Ekonominë Botërore (IfW), prodhimi industrial, në veçanti, vlerësohet të jetë ulur me më shumë se 1% gjatë një muaji me 30 ditë nivele të ulëta uji.

Sektori i ndërtimit shënon rritje të konsiderueshme

Tendenca pozitive e vërejtur në gusht u nxit kryesisht nga rritja e prodhimit në ndërtim, i cili u zgjerua me 9,3% krahasuar me muajin e kaluar. “Brenda sektorit të ndërtimit, spikat fusha e aktiviteteve të specializuara të ndërtimit dhe punimeve përfundimtare, duke shfaqur një rritje prej 13,1% krahasuar me muajin e kaluar,” shpjeguan statistikanët. Në të kundërt, prodhimi i energjisë ra me 0,4%.

Vetëm sektori industrial e rriti prodhimin me 0,6%. Prodhuesit e makinerive, në veçanti, regjistruan një rritje të fortë prej 5,3%. Nga ana tjetër, një rënie e mëtejshme prej 5,4% në industrinë e automobilave pati ndikim negativ; kjo i atribuohet, të paktën pjesërisht, mbylljeve të zakonshme të fabrikave në këtë sektor gjatë muajit gusht.

“Më në fund, një shifër pozitive për industrinë gjermane, e cila ka qenë nën presion të konsiderueshëm,” komentoi Jörg Krämer, kryeekonomist në Commerzbank, lidhur me këtë tendendë. Në fund të fundit, sektori industrial po përfiton nga rritja e shpenzimeve për mbrojtjen, si dhe nga digjitalizimi në rritje dhe prirja drejt inteligjencës artificiale (IA). “Ky zhvillim tregon se hovi i madh rreth IA-së dhe qendrave të të dhënave ka mbërritur edhe në Gjermani,” tha Wanke, një ekspert në KfW.

Portofole porosish të mbushura mirë

Perspektiva për një rimëkëmbje industriale në muajt e ardhshëm është premtuese: portofolet e porosive janë më të mbushura se në çdo kohë tjetër që nga fillimi i regjistrimit të të dhënave në vitin 2015.

Megjithatë, muaji gusht shënoi një pengesë: anulimi i kontratave të mëdha të mbrojtjes çoi në një rënie të mprehtë të porosive për industrinë gjermane. Porositë e reja ranë me 10,6% krahasuar me korrikun – rënia më e madhe e regjistruar që nga janari. Edhe eksportuesit janë më optimistë.

Fakti që prodhimi i përgjithshëm u rrit në gusht – pavarësisht rreziqeve të vazhdueshme si nivelet e ulëta të ujit në lumin Rin dhe kriza në rajonin e Gjirit – rrit gjasat që ekonomia gjermane të shënojë tremujorin e saj të katërt radhazi të rritjes këtë verë. Kjo vlen veçanërisht duke pasur parasysh se eksportuesit gjermanë po rrisin gjithashtu parashikimet e tyre të rritjes pas një gjysme të parë të vitit që rezultoi befasuese për nga fuqia e saj.

Eksportet pritet të rriten me 1,0% këtë vit, pavarësisht rënieve në tregun kinez, sipas Federatës Gjermane të Tregtisë me Shumicë, Tregtisë së Jashtme dhe Shërbimeve (BGA). Në janar, parashikimi ishte për një rritje prej vetëm 0,6%. Importet pritet të rriten me 3%, në përputhje me parashikimet e mëparshme.

“Tregtia e jashtme gjermane po stabilizohet, por jemi ende larg një kthese vendimtare,” tha presidenti i BGA-së, Dirk Jandura. “Rëniet në eksportet tona drejt Shteteve të Bashkuara dhe Kinës tregojnë se sa e paqëndrueshme mbetet situata.”/DW