Bashkitë që “shkrihen” protestë pranë Kuvendit, Balla: Territorialja do të votohet sot! Shqiptarët na dhanë 83 mandate

Ndërsa jashtë Kuvendit vijon protesta e qytetarëve kundër reformës territoriale, kreu i grupit parlamentar të Partisë Socialiste, Taulant Balla, ka deklaruar se reforma do të votohet në seancën e sotme.

“Ftesa ime për ju sot është që t’i përgjigjeni ofertës. Të enjten e javës së ardhshme, t’i bashkoheni komisionit për kompetencat. Keni një javë kohë. Kjo sot do të votohet”, deklaroi Balla.

Ai argumentoi se reforma është hartuar pas një pune njëvjeçare, gjatë së cilës, sipas tij, janë dëgjuar komunitetet dhe janë konsultuar bashkitë.

Balla u shpreh se ndryshimet synojnë përmirësimin e shërbimeve për qytetarët dhe shtoi se qeveria është e gatshme t’u transferojë bashkive të reja kompetenca që aktualisht nuk i kanë.

“Dallimi mes nesh dhe juve është se ju interesoni për kreun e bashkisë, ne për qytetarët që të marrin shërbime më të mira. Jemi gati t’u transferojmë bashkive të reja kompetenca që sot nuk i kanë. Ju keni hall karrigesh, ne kemi hall shërbimesh”, tha kreu i grupit parlamentar të PS.

Balla gjithashtu iu referua afatit të komisionit të posaçëm për reformën zgjedhore, duke theksuar se mandati i tij përfundon në fund të nëntorit dhe duke kërkuar që opozita t’i bashkohet punës për kompetencat e njësive të reja vendore.

Fraksion.com