“Pyeti Zelenskyn në Serbi”, Rusia e fut gazetarin gjerman Michael Martens në listën e të kërkuarve

Rusia po punon për ta vendosur gazetarin gjerman Michael Martens në listën ndërkombëtare të të kërkuarve pas pyetjes së tij drejtuar Presidentit Volodymyr Zelensky më 8 gusht në lidhje me atë që vendet evropiane mund të bënin për të ndihmuar Ukrainën të vriste më shumë ushtarë rusë.

Martens, një korrespondent i Frankfurter Allgemeine Zeitung (FAZ), mund të përballet me deri në gjashtë vjet burg nëse dënohet sipas Pjesës 2 të Nenit 282 të Kodit Penal të Rusisë, që ka të bëjë me nxitjen e urrejtjes ose armiqësisë, sipas TASS duke cituar një burim anonim më 15 gusht.

“Për momentin, Martens është i listuar vetëm në bazën e të dhënave të personave të kërkuar të Ministrisë së Brendshme. Por ai ende nuk është shpallur në kërkim ndërkombëtar”, sipas TASS.

“Kjo do të ndodhë pasi të përfundojë procesi i nevojshëm procedural.”

Lidhja e Martens me Ballkanin

Zelensky mbërriti në Serbi më 7 gusht, për herë të parë që nga marrja e detyrës në vitin 2019, për të filluar bisedime dypalëshe me Presidentin serb Aleksandar Vuçiç dhe Kryeministrin Đuro Macut mbi lidhjet ekonomike, marrëdhëniet me BE-në dhe sigurinë më të gjerë.

Martens mori pjesë në një konferencë të përbashkët për shtyp në Beograd më 8 gusht gjatë takimit të dy udhëheqësve dhe pyeti se çfarë mund të bënin evropianët “në mënyrë specifike” për të ndihmuar Ukrainën “të vriste më shumë rusë”, përpara se të sqaronte se ai nënkuptonte ushtarë rusë, jo qytetarë të rregullt.

“As Zelensky dhe as Vuçiç nuk iu përgjigjën pyetjes, por kamerat televizive kapën shprehjen e tmerruar në fytyrën e presidentit serb”, raportoi AFP.

Pyetja shkaktoi kritika në Rusi, Serbi dhe Gjermani, duke nxitur një peticion online që kërkonte shkarkimin e Martens.

Vlen të përmendet se Serbia ka mbetur një nga vendet e pakta evropiane që refuzon t’u bashkohet sanksioneve perëndimore kundër Rusisë, ndërsa lidhjet e saj të forta me Rusinë datojnë nga një histori e përbashkët si ish-shtete komuniste, me Serbinë që ka qenë pjesë e ish-Jugosllavisë dhe Rusinë një shtet pasardhës sovjetik.

Martens ka kaluae gjashtë vjet duke jetuar në Beograd. Ai jetoi edhe në Kiev, dhe në një moment, ai madje jetoi në Shën Petersburg në Rusi. Ai shkroi dhe botoi libra të shumtë për Jugosllavinë dhe artistët e saj, veçanërisht Ivo Andrić – një romancier dhe poet jugosllav që fitoi Çmimin Nobel në vitin 1961.

Serbia shpesh përshkruhet si një regjim hibrid, ose ajo që kritikët e quajnë një “demokraci me të meta” – diçka që Martens e ka kritikuar fort gjatë gjithë karrierës së tij.

Edhe pse puna e tij gazetareske synon analiza kritike dhe jo paragjykime anti-serbe, ai mbuloi gjerësisht shpërbërjen e Jugosllavisë dhe Luftën Kroate për Pavarësi, dhe, në shkrimet e tij, kritikoi ashpër sjelljen e kaluar të Vuçiçit dhe qëndrimet politike të lidhura me konfliktet – duke përfshirë kohën e tij të supozuar si vullnetar në territorin e kontrolluar nga serbët e Bosnjës gjatë luftës në Bosnjë.

FAZ përgjigjet duke mbrojtur Martens

FAZ u përgjigj nëm mbrojtje të Martens, duke deklaruar se “pyetja i referohej debateve aktuale” mbi mënyrat për të ushtruar presion ndaj Rusisë. Megjithatë, gazeta “shprehu keqardhje” që pyetja ishte “formuluar në mënyrë të paqartë”, sipas AFP, duke shtuar se qëndrimi i saj editorial nuk ishte që sa më shumë ushtarë rusë të vriteshin.

Në mediat sociale, veçanërisht në X, Martens qëndroi në qëndrimin e tij përballë kritikave, duke këmbëngulur se dëshira për të vrarë ushtarët është një “objektiv fisnik”.

Ambasada Ruse në Berlin tha të martën, më 18 gusht, se kishte kërkuar një vlerësim ligjor nga prokurorët e Berlinit, duke pretenduar se komentet mund të përbënin nxitje për urrejtje ose thirrje publike për akte të paligjshme.

Zëdhënësja e Ministrisë së Jashtme ruse, Maria Zakharova, e quajti gjithashtu komentin të papranueshëm dhe kriminal, sipas TASS.

Fraksio.com