“Nuk u luajt himni kombëtar”, Ministria e Jashtme reagon pas incidentit në Pustec në praninë e Mickovskit: Mungesë respekti dhe shmangie rregullash
Ministria për Evropën dhe Punët e Jashtme, me në krye ministrin Ferit Hoxha, ka reaguar pas një aktiviteti kulturor të zhvilluar në Pustec, ku në prani të Kryeministrit të Maqedonisë së Veriut nuk u luajt Himni Kombëtar Shqiptar.
“MEPJ shpreh keqardhje për faktin që, në një aktivitet kulturor të zhvilluar dje në Pustec, me pjesëmarrjen e Kryeministrit të Maqedonisë së Veriut dhe të Kryetarit të Bashkisë, nuk u luajt edhe Himni Kombëtar Shqiptar, krahas atij të Maqedonisë së Veriut.
Respekti për simbolet kombëtare nuk duhet të jetë çështje politike apo interpretimi. Ai është pjesë e etikës institucionale, e protokollit dhe, mbi të gjitha, e respektit të ndërsjellë, veçanërisht në një hapësirë ku bashkëjetojnë komunitete dhe identitete të ndryshme.
Në Pustec, ashtu si në çdo hapësirë të Republikës së Shqipërisë, respekti për simbolet kombëtare është pjesë e respektit për vetë qytetarët, për vlerat e bashkëjetesës demokratike dhe kulturës qytetare që na bashkon. Është gjithashtu themel i fqinjësisë së mirë dhe marrëdhënieve të shëndosha ndërmjet njerëzve dhe shteteve tona”, shkruhet në reagimin e Ministrisë.
Fraksion.com
