Arrestohet në NATO praktikantja kanadeze me origjinë kineze, dyshime spiunazhi

Një shtetase kanadeze me origjinë kineze e dyshuar për kryerjen e “spiunazhit në emër të një vendi të tretë” gjatë një stazhi në NATO është arrestuar në Belgjikë, thanë autoritetet të shtunën.

Praktikantja, e cila punonte në Shtabin Suprem të Fuqive Aleate për Evropën (SHAPE) të aleancës mbrojtëse të udhëhequr nga SHBA-të në Mons, u arrestua të enjten, tha Zyra e Prokurorit Federal.

“Ajo dyshohet për spiunazh në emër të një vendi të tretë dhe për anëtare të një organizate kriminale,” tha zyra e prokurorit në një deklaratë.

“E dyshuara kishte rënë në sy të shërbimeve të sigurisë të SHAPE-së, të cilat e raportuan çështjen në Shërbimin e Përgjithshëm të Inteligjencës dhe Sigurisë,” shtoi zyra, pa specifikuar natyrën e spiunazhit të dyshuar.

Pasi mori në dorëzim çështjen, zyra e prokurorit ia besoi hetimin policisë gjyqësore federale në Charleroi, e cila kreu kontrolle të enjten në shtëpinë e të dyshuarës, si dhe në vendin e saj të punës.

Një magjistrat më pas i dorëzoi të dyshuarës një urdhër arresti të premten.

Fraksion.com