Shtetet arabe dhe OKB-ja dënojnë bllokadën e ndihmës në Gaza nga Izraeli

Disa shtete arabe dhe OKB e kanë dënuar Izraelin për bllokimin e hyrjes së të gjithë ndihmave humanitare në Rripin e Gazës.

Egjipti dhe Katari thanë se masa izraelite të dielën, 2 mars 2025, shkeli marrëveshjen e  armëpushimit, ndërsa shefi humanitar i OKB-së Tom Fletcher e përshkroi atë si “alarmante”.

Kryeministri izraelit Benjamin Netanyahu tha se vendi i tij veproi sepse Hamasi po vidhte furnizimet dhe po i përdorte ato “për të financuar makinën e tij terroriste”.

Ai akuzoi gjithashtu grupin palestinez për refuzimin e një propozimi të SHBA për të zgjatur armëpushimin në Gaza, pasi ai skadoi më 1 mars 2025. Izraeli tha se e kishte miratuar propozimin.

Një zëdhënës i Hamasit tha se bllokada e Izraelit ishte “shantazh i lirë” dhe një “grusht shteti” kundër marrëveshjes së armëpushimit.

Marrëveshja e armëpushimit ndaloi 15 muaj luftimesh midis Hamasit dhe ushtrisë izraelite, duke lejuar lirimin e 33 pengjeve izraelitë për rreth 1900 të burgosur dhe të paraburgosur palestinezë.

Në një deklaratë më 2 mars, ministria e Jashtme e Katarit tha se “dënon fuqishëm” vendimin izraelit, duke e përshkruar atë si “një shkelje të qartë të marrëveshjes së armëpushimit” dhe “të drejtës ndërkombëtare humanitare”. Në Egjipt, ministria e Jashtme akuzoi Izraelin për përdorimin e urisë si “një armë kundër popullit palestinez”, raportoi agjencia e lajmeve AFP.

Si Katari ashtu edhe Egjipti ndihmuan për të ndërmjetësuar marrëveshjen e armëpushimit në Gaza.

Ndërkohë, Arabia Saudite shprehu “dënimin dhe denoncimin” e saj për bllokadën e ndihmës izraelite, tha ministria e Jashtme.

Tom Fletcher, nënsekretari i përgjithshëm i OKB-së për Çështjet Humanitare, shkroi në një postim në X se  “E drejta ndërkombëtare humanitare është e qartë: Ne duhet të na lejohet qasja për të ofruar ndihma jetike për shpëtimin e jetës”.

Kurse Netanyahu tha se Izraeli kishte vendosur të vepronte “sepse Hamasi vjedh furnizimet dhe i pengon njerëzit e Gazës t’i marrin ato. “Ai i përdor këto furnizime për të financuar makinën e tij terroriste, e cila synon drejtpërdrejt Izraelin dhe civilët tanë, dhe këtë ne nuk mund ta pranojmë.”

Por Hamasi ka mohuar se ka vjedhur ndihma humanitare në Gaza.

Netanyahu tha gjithashtu se Hamasi po refuzonte të pranonte një zgjatje të përkohshme të armëpushimit të propozuar nga i dërguari i presidentit amerikan Donald Trump, Steve Witkoff.

Faza e parë e armëpushimit hyri në fuqi më 19 janar dhe skadoi në mesnatën e së shtunës së 1 marsit.

Negociatat në fazën e dytë, që synonin të çonin në një armëpushim të përhershëm, lirimin e të gjithë pengjeve të mbetura të gjallë dhe tërheqjen e forcave izraelite nga Gaza, duhej të fillonin javë më parë , por mezi kanë filluar. Besohet se janë 24 pengje të gjallë, ndërsa 39 të tjerë supozohet të jenë të vdekur.

Faza e tretë ka për qëllim të rezultojë në kthimin e të gjithë trupave të mbetur të pengjeve të vdekur dhe rindërtimin e Gazës, i cili pritet të marrë vite.

Hamasi ka thënë më parë se nuk do të pajtohet me asnjë zgjatje të fazës së parë pa garanci nga ndërmjetësit se faza e dytë do të ndodhë përfundimisht.

Ndërsa faza e parë e marrëveshjes skadoi më 1 mars, zyra e Netanyahut tha se Izraeli kishte rënë dakord me propozimin e Witkoff që armëpushimi të vazhdonte për rreth gjashtë javë gjatë muajit të shenjtë mysliman të Ramazanit dhe periudhave të Pashkës hebreje.

Nëse në fund të kësaj periudhe negociatat do të arrinin në një rrugë pa krye, Izraeli do të rezervonte të drejtën të kthehej në luftë.

Witkoff nuk e ka bërë publik propozimin e tij. Sipas Izraelit, do të fillonte me lirimin e gjysmës së të gjithë pengjeve të mbetura të gjallë dhe të vdekur. Thuhet se Witkoff nga Izraeli ka propozuar zgjatjen e përkohshme pasi u bind se duhej më shumë kohë për të kapërcyer dallimet midis Izraelit dhe Hamasit mbi kushtet për përfundimin e luftës.

Agjencitë e ndihmës konfirmuan se asnjë kamion ndihme nuk ishte lejuar në Gaza, në mëngjesin e  2 marsit 2025.

“Ndihma humanitare duhet të vazhdojë të shkojë në Gaza. Është shumë thelbësore. Dhe ne po u bëjmë thirrje të gjitha palëve që të sigurohen që të arrijnë një zgjidhje,” tha Antoine Renard nga Programi Botëror i Ushqimit (WFP) për mediat ndërkombëtare.

Mijëra kamionë kanë hyrë në Rripin e Gazës çdo javë që kur u ra dakord për armëpushimin në mes të janarit. Agjencitë e ndihmës kanë arritur të ruajnë furnizime, që do të thotë se nuk ka asnjë rrezik të menjëhershëm për popullatën civile.

Gjithashtu të dielën, më 2 mars,  mjekët thanë se katër persona ishin vrarë në sulmet izraelite në Gaza. Ushtria izraelite tha se kishte sulmuar njerëzit që po vendosnin një mjet shpërthyes në veri të territorit.

Kujtojmë se Hamasi kreu një sulm të paprecedentë ndaj Izraelit më 7 tetor 2023, duke vrarë rreth 1200 njerëz dhe duke marrë peng 251 të tjerë. Izraeli u përgjigj me një fushatë ajrore dhe tokësore në Rripin e Gazës, gjatë së cilës janë vrarë të paktën 48,365 njerëz, sipas ministrisë së shëndetësisë të territorit të drejtuar nga Hamasi.

 

Fraksion.com