“Përdorte tre identitete”: Arrestohet në Muriqan 31-vjeçari nga Mamurrasi, në kërkim ndërkombëtar për vjedhje

Një 31-vjeçar shqiptar, i shpallur në kërkim ndërkombëtar nga autoritetet spanjolle për vjedhje me dhunë, është arrestuar nga Policia Kufitare në Muriqan, teksa po tentonte të largohej nga Shqipëria.

Sipas Policisë, arrestimi u realizua si rezultat i shkëmbimit të informacionit mes shërbimeve të Policisë Kufitare Muriqan dhe Interpol Tiranës, në kuadër të kontrolleve për kapjen e personave të shpallur në kërkim ndërkombëtar.

31-vjeçari ishte shpallur në kërkim nga Interpol Madridi, pasi Gjykata e Instruksionit nr. 4 në Sabadell të Spanjës, me vendimin e datës 28 nëntor 2025, kishte caktuar ndaj tij masën e sigurisë “Arrest në burg” për veprën penale “Vjedhja me dhunë”.

Pas ndalimit në pikën kufitare të Muriqanit, i riu iu dorëzua shërbimeve të Drejtorisë Vendore të Policisë Lezhë, të cilat kryen arrestimin e tij të përkohshëm me qëllim ekstradimin drejt Spanjës.

Ndërkohë, Interpol Tirana, në bashkëpunim me autoritetet spanjolle, po vijon procedurat ligjore për ekstradimin e 31-vjeçarit, i cili kërkohet nga drejtësia spanjolle për t’u përballur me akuzën e vjedhjes me dhunë.

Fraksion.com