Serbi: Arrestohet shefi i policisë për shërdorim detyre
Marko Kricak, besnik i Aleksandar Vuçiçit, akuzohet se ka fshehur dhe manipuluar një hetim për një vrasje në botën e krimit. Prokurorët thonë se arrestimi i tij nuk ka lidhje me humbjen e Vuçiçit në zgjedhjet e fundit.
Shefi i Drejtorisë së Policisë së Krimeve të Serbisë akuzohet për shpërdorim detyre. Sipas mediave shtetërore Marko Kricak akuzohet se ka fshehur dhe manipuluar një hetim lidhur me vrasjen, në muajin maj, të një figure të dyshuar të botës së krimit në një restorant në Beograd.
Kush është shefi i policisë Marko Kricak?
42-vjeçari konsiderohet si mbështetës i ish-presidentit serb, Aleksandar Vuçiç, që u mund nga Lista Studentore në zgjedhjet parlamentare të 25 tetorit. Marko Kricak është akuzuar edhe nga grupet studentore për “brutalitet” në reagimin e policisë ndaj protestave paqësore kundër Vuçiçit.
Largimi i Kricakut dhe i besnikëve të tjerë të Vuçiçit nga policia dhe aparati i shërbimit sekret në Serbi ishte një nga kërkesat e liderëve studentorë.
Megjithatë kryeprokurori i Beogradit, Nenad Stefanoviç, mohoi çdo lidhje mes kërkesave të lëvizjes studentore dhe arrestimit të Kricakut. “Ky arrestim nuk ka asnjë lidhje me rezultatin e zgjedhjeve parlamentare”, u tha ai gazetarëve.
A po shpërbëhet sistemi i Vuçiçit?
Megjithatë arrestimi i një zyrtari të lartë policor që konsiderohej i afërt me regjimin e mëparshëm po shihet si një shembull i dobësimit gradual të strukturave të sistemit të Vuçiçit.
Kricak ka punuar si shitës automjetesh përpara se të rekrutohej në Agjencinë Serbe të Shërbimit Sekret të Brendshëm (BIA) dhe ishte një mbështetës besnik i Partisë Progresiste Serbe (SNS) të Vuçiçit.
Në korrik 2023 ai u emërua komandant i Njësisë për Mbrojtjen e Personaliteteve (JZO) të policisë serbe.
Sipas akuzave gjatë kohës që mbante këtë post, ai drejtoi personalisht rrëmbimin e një grupi studentësh, duke sulmuar fizikisht një studente dhe duke e kërcënuar se do ta përdhunonte në bodrumin e një ndërtese qeveritare në Beograd.
Në fund të vitit 2025, ai u emërua në krye të Policisë së Krimeve të Serbisë./DW
Fraksion.com
