Kina përjashton dy zyrtarë të lartë të Partisë dhe ushtrisë

Dy nga oficerët më të lartë ushtarakë të Kinës po përballen me akuza për korrupsion dhe mosbesnikëri. Njëri prej tyre konsiderohej prej kohësh si një aleat i ngushtë i presidentit Xi Jinping.

Autoritetet kineze kanë shkarkuar  përfundimisht dy nga oficerët më të lartë ushtarakë të vendit. Zhang Youxia dhe Liu Zhenli janë përjashtuar nga Partia Komuniste dhe forcat e armatosura, sipas agjencisë shtetërore të lajmeve Xinhua. Hetimet ndaj të dyve ishin në zhvillim që nga janari për shkelje të rënda të disiplinës dhe ligjit.

Gjeneralët akuzohen, ndër të tjera, për korrupsion, abuzim me pushtetin dhe mosbesnikëri ndaj partisë. Sipas Xinhua, ata dyshohet se kanë përdorur pozitat e tyre për t’i ndihmuar të tjerët të sigurojnë avancim në detyrë. Në këmbim, thuhet se ata kanë pranuar shuma të mëdha parash. Hetuesit flasin për shuma jashtëzakonisht të mëdha.

Liu Zhenli ishte anëtar i Komisionit Qendror Ushtarak dhe drejtonte Departamentin e Shtabit të Përgjithshëm të tij

Veç kësaj, thuhet se Zhang dhe Liu kanë formuar klika dhe fraksione, duke shkelur kështu rregullat politike të partisë. Ata gjithashtu akuzohen për keqpërdorim të detyrës dhe pasurim personal. Rastet e tyre tani do t’u përcillen autoriteteve gjyqësore ushtarake për shqyrtim dhe ndjekje penale.

Sipas agjencisë së lajmeve Xinhua, përjashtimi i tyre nga Partia Komuniste ende duhet të konfirmohet në një seancë plenare të Komitetit Qendror.

Zhang ishte numri dy i ushtrisë kineze

Rasti i Zhang Youxia është me rëndësi të veçantë. Si zëvendëskryetar i dytë më i lartë i Komisionit Ushtarak Qendror, ai raportonte drejtpërdrejt te kreu i shtetit dhe i partisë, Xi Jinping. Ky organ është autoriteti më i lartë komandues i Forcave të Armatosura Kineze.

Zhang konsiderohej për një kohë të gjatë si bashkëpunëtor i ngushtë i Xi-t. Për më tepër, ai ishte anëtar i Byrosë Politike të Partisë Komuniste. Ai është gjithashtu një nga pak oficerët e lartë kinezë me përvojë lufte të drejtpërdrejtë.

Liu Zhenli ishte gjithashtu anëtar i Komisionit Qendror Ushtarak. Ai drejtonte Departamentin e Shtabit të Përgjithshëm dhe për rrjedhojë ishte pjesë e udhëheqjes ushtarake.

Ministria e Mbrojtjes i kishte njoftuar hetimet ndaj të dy ushtarakëve në janar. Në fund të gushtit, Zhang dhe Liu u hoqën nga postet e tyre në Komisionin Qendror Ushtarak. Më parë, atyre iu hoqën mandatet edhe në Kongresin Popullor Kombëtar.

Xi lufton prej vitesh korrupsionin në ushtri

Forcat e armatosura kanë qenë në shënjestrën e fushatës anti-korrupsion të Xi-t për vite me radhë. Kreu i shtetit e nisi këtë fushatë pasi erdhi në pushtet në vitin 2012 dhe e zgjeroi atë te partia, autoritetet dhe ushtria.

Sipas ekspertëve, fushata nuk është drejtuar vetëm kundër korrupsionit. Ata argumentojnë se kjo gjithashtu ndihmon në forcimin e kontrollit të Xi-së mbi forcat e armatosura dhe në sigurimin e besnikërisë politike të udhëheqjes ushtarake ndaj Partisë Komuniste.

Që në tetor 2025, He Weidong, gjithashtu zëvendëskryetar i Komisionit Qendror Ushtarak, dhe admirali Miao Hua ishin përjashtuar nga Partia dhe forcat e armatosura.

Ish-ministrat e Mbrojtjes Li Shangfu dhe Wei Fenghe gjithashtu humbën anëtarësinë e partisë në vitin 2024. Në maj të këtij viti, të dy u dënuan me vdekje për korrupsion. Ekzekutimi i dënimit u pezullua për dy vjet. Në Kinë, dënimet e tilla zakonisht më pas shndërrohen në burgim të përjetshëm.

Për më tepër, vendimi për Zhang dhe Liu merret  vetëm disa ditë para udhëtimit të planifikuar të Xi Jinping-ut në SHBA për të zhvilluar bisedime me presidentin amerikan Donald Trump. Një mbledhje e madhe e partisë është planifikuar disa javë më vonë, në të cilën, ndër çështje të tjera, do të trajtohen udhëheqja dhe disiplinë e brendshme e partisë./DW