Raporti mbi Mbrojtjen e Kushtetutës: “Gjermania nën presion”

Rusia, Kina dhe Irani janë veçanërisht aktive

Ministri gjerman i Brendshëm, Alexander Dobrindt (CSU), shpjegoi se si është krijuar kjo situatë, në prani të presidentit të BfV-së, Sinan Selen: “Aktivitetet e huaja në Gjermani janë në rritje. Raportet dhe informacionet lidhur me planifikimin e sulmeve po rriten. Numri i ekstremistëve të gatshëm të përdorin dhunë po rritet.”

Sipas të dhënave, kërcënimi kryesor i huaj vazhdon të vijë nga Rusia. Dobrindti përmend si shembull rastin e tre meshkujve që tani janë dënuar për spiunazh: “Ata dyshohet se ishin ngarkuar, në emër të shërbimeve sekrete ruse, të spiunonin linjat hekurudhore dhe infrastrukturën, dhe të planifikonin sulme të mundshme. ”

Ekstremizmi i djathtë dhe i majtë: skena po bëhet gjithnjë e më e re

Kina dhe Irani përmenden gjithashtu në raportin e Zyrës për Mbrojtjen e Kushtetutës. Sidoqoftë, sipas informacionit të mbledhur, aktivitetet e tyre janë në fusha të tjera: spiunazh ekonomik dhe frikësimi i njerëzve nga këto vende që jetojnë në mërgim.

Sipas vlerësimit të Dobrindt-it dhe Selen-it, ekstremizmi i djathtë paraqet kërcënimin më të madh për demokracinë dhe kohezionin shoqëror. Skena, e cila ka një moshë mesatare gjithnjë e më të re, po bëhet gjithnjë e më e rrjetëzuar dhe gjithnjë e më e orientuar drejt veprimit. Kjo thuhet është veçanërisht shqetësuese. Të dy paraqitën një tablo të ngjashme të ekstremizmit të majtë.

AfD-ja është më shumë se kurrë në qendër të vëmendjes

Alternativa për Gjermaninë (AfD), e klasifikuar  si ‘e vërtetuar e ekstremit të djathtë’ nga Zyra për Mbrojtjen e Kushtetutës në pesë nga gjashtëmbëdhjetë landet federale, gjithashtu luan një rol të rëndësishëm. ‘Homogjenizimi ideologjik’ i partisë po vazhdon, dhe botëkuptimi i saj karakterizohet nga një ‘koncept i popullit bazuar në etni dhe prejardhje’. Kjo bie në kundërshtim me konceptin e popullit siç përcaktohet në Ligjin Themelor.

Ky vlerësim përfshihet gjithashtu në ekspertizën ligjore të publikuar së fundmi nga Gesellschaft für Freiheitsrechte (GFF). Kjo organizatë joqeveritare (OJQ), e financuar nga donacione, konkludon se AfD është qartë antikushtetuese. Dobrindt nuk kishte dëshirë të komentonte për këtë çështje, pasi mendimi po analizohet ende brenda ministrisë së tij.

Argumente të reja në favor të procedurave për ndalimin e AfD-së?

Ministri i Brendshëm deri tani ka refuzuar të nisë procedura për ndalimin e AfD-së para Gjykatës Kushtetuese Federale. Një mocion në këtë drejtim mund të paraqitet nga qeveria federale, Bundestagu ose Bundesrati. Megjithatë, Dobrindt thekson se provat e cituara në opinionin e GFF-së ishin të aksesueshme lirshëm për publikun dhe tashmë ishin vënë në dijeni të autoriteteve të sigurisë.

Zyra Federale për Mbrojtjen e Kushtetutës kishte përgatitur më parë një raport ekspertësh mbi AfD-në. Ky raport e përshkruante partinë në tërësi si ‘një organizatë të vërtetuar ekstremiste të djathtë’. Megjithatë, agjencia u detyrua të tërheqë përkohësisht klasifikimin e saj pas një ankese të depozituar nga AfD-ja në Gjykatën Administrative të Kelnit. Një vendim përfundimtar mbi këtë mosmarrëveshje ende nuk është dhënë.

Çfarë nënkupton Alexander Dobrindt me ‘shërbime të duhura inteligjence’?

‘Gjermania është nën presion,’ thotë Ministri i Brendshëm Dobrindt përballë shumë kërcënimeve ndaj demokracisë. Por ne gjithashtu jemi në gjendje të mbrojmë veten, shton ai. Për të vënë kërcënimin nën kontroll, megjithatë, ne duhet të vazhdojmë të forcojmë kapacitetet tona, si teknikisht ashtu edhe në aspektin e pushteteve hetimore. Për këtë qëllim, sipas propozimeve të Dobrindt-it, Bundestagu duhet të ndryshojë legjislacionin sa më shpejt të jetë e mundur në mënyrë që, ndër të tjera, të kryhet një mbikëqyrje më e madhe e komunikimeve digjitale dhe të dhënat të ruhen për periudha më të gjata.

Ministri i Sigurisë së Brendshme kështu dëshiron të transformojë jo vetëm Zyrën Federale për Mbrojtjen e Kushtetutës, por edhe Shërbimin Federal të Inteligjencës (BND), i cili operon jashtë vendit, në ‘shërbime të vërteta inteligjence’. Për kreun e Zyrës Federale për Mbrojtjen e Kushtetutës, Selen, kjo nënkupton mundësinë që në të ardhmen të ndërmerren edhe masa mbrojtëse aktive. Deri tani, agjencia e tij ka qenë e autorizuar vetëm të vëzhgojë dhe monitorojë për të mbledhur informacione mbi akte të mundshme spiunazhi, sabotimi ose sulme të planifikuara terroriste.

Shërbimet e inteligjencës gjermane duan më shumë ‘hapësirë manovrimi’

Selen-i i referohet një qasjeje me tre drejtime që përfshin zbulimin, ndërprerjen (neutralizimin) dhe parandalimin: ‘Ne duam dhe duhet të jemi pjesë e këtij cikli nëse duam të përballemi me kërcënimet hibride, përfshirë edhe në nivel ndërkombëtar.’ Ai kështu i referohet shkëmbimit të informacionit midis shërbimeve të ashtuquajtura ‘miqësore’.

Në vende të tjera demokratike si Shtetet e Bashkuara, Mbretëria e Bashkuar ose Izraeli, ka më pak kufizime ligjore. Kjo është arsyeja pse shërbimet e inteligjencës gjermane prej kohësh kanë kërkuar më shumë pushtet – ata e quajnë këtë ‘hapësirë manovrimi’.

Çfarë e karakterizon një shtet të aftë të veprojë?

Koalicioni qeveritar që përbëhet nga Socialdemokratët (SPD) dhe partitë unioniste(CDU/CSU) ka ndërmend të përmbushë këtë dëshirë falë shumicës së tij në Parlament. “Kushdo që sulmon demokracinë tonë do të përballet me një shtet të aftë të veprojë,” thotë Sebastian Fiedler, deputet i SPD-së. “Ne veprojmë si një koalicion për sigurinë dhe po themelojmë autoritete të forta sigurie, kompetenca të qarta dhe një arkitekturë sigurie të aftë të përballet me kërcënimet e shekullit të 21-të.”

Kritika kanë ardhur nga e Majta, e cila është në opozitë në Bundestag: Clara Bünger, zëdhënëse për politikën e brendshme, akuzon ministrin e Brendshëm Dobrindt se po kërkon të krijojë një shërbim inteligjence me pushtete policore. Prandaj ajo kërkon: “Në një demokraci, masat e marra nga shteti duhet t’i nënshtrohen kontrollit të pavarur dhe nuk duhet të kryhen fshehurazi.”/DW