“Terapi hormonale për transgjinorët”, Mitropoliti i Korçës: Prindërit të mbrojnë fëmijët dhe vlerat familjare

1 Qershor, 2026 admin

Mitropoliti i Korçës, Imzot Anastasi, u bëri thirrje prindërve që të tregojnë kujdes të veçantë për edukimin dhe formimin e fëmijëve të tyre, duke theksuar se familja mbetet institucioni më i rëndësishëm në transmetimin e besimit, traditës dhe vlerave morale.

Sipas tij, prindërit janë ata që mbajnë rrënjët, besimin dhe shembullin e brezave të mëparshëm, ndaj askush nuk mund të kujdeset për fëmijët me të njëjtën përkushtim si familja. Ai shprehu shqetësimin se shkolla dhe institucionet e tjera nuk janë gjithmonë në përputhje me vlerat që familjet dëshirojnë t’u transmetojnë fëmijëve të tyre.

Mitropoliti nënvizoi se prindërit kanë barrën dhe përgjegjësinë për t’i rritur fëmijët jo vetëm të shëndetshëm fizikisht, por edhe të formuar shpirtërisht, me karakter, urtësi dhe ndjenja të forta morale. Ai theksoi se edukimi nuk duhet të kufizohet vetëm te njohuritë akademike apo kurset e ndryshme, por duhet të përfshijë edhe formimin e personalitetit dhe të ndërgjegjes.

Në fjalën e tij, ai paralajmëroi se shoqëria po përballet me ideologji dhe agjenda që, sipas tij, synojnë dobësimin e familjes tradicionale dhe shpërbërjen e lidhjeve shoqërore. Për këtë arsye, ai u kërkoi prindërve të mos qëndrojnë indiferentë, por të jenë vigjilentë dhe aktivë në mbrojtjen e vlerave që dëshirojnë t’u lënë brezave të ardhshëm.

Mesazhi i Mitropolitit përqendrohet te roli vendimtar i familjes në ruajtjen e identitetit, besimit dhe kohezionit shoqëror, duke e konsideruar edukimin e fëmijëve si një nga misionet më të rëndësishme të kohës sonë.

Fraksion.com

Mund të pëlqeni gjithashtu...