“48 orë punë intensive”, rezoluta e përbashkët për integrimin, Balla: Të mos e prishim punën e mirë të komisionit
Kryetari i grupit parlamentar të Partisë Socialiste, Taulant Balla ka deklaruar sot në fjalën e tij në Kuvend se rezoluta për procesin e integrimit europian është miratuar me konsensus të plotë në Komisionin për Europën dhe Punët e Jashtme, pas pesë orësh diskutime mes mazhorancës dhe opozitës.
Sipas Ballës, dokumenti i dakordësuar është ndër më të mirët që ka miratuar ndonjëherë komisioni parlamentar. Ai sqaroi se, debati në Kuvend lidhet drejtpërdrejt me nenin 103/1 të Rregullores, i cili parashikon që në përfundim të debatit të miratohet rezoluta.
Për këtë arsye, Balla kërkoi që fillimisht të prezantohet dokumenti i komisionit dhe më pas të vijojë debati parlamentar. Kreu i grupit socialist falënderoi publikisht edhe përfaqësuesit e opozitës për bashkëpunimin gjatë diskutimeve.
Në fund, Balla apeloi që konsensusi i arritur në komision të mos prishet gjatë seancës plenare.
“Në Komisionin për Europën dhe Punët e Jashtme, të gjithë së bashku, pa asnjë votë kundër, pa asnjë abstenim, të gjitha pro, kemi miratuar një dokument, ndër më të mirët që ka miratuar ndonjëherë ky Komision. Pas 5 orësh debat, ka brenda edhe kritikën, edhe angazhimin, edhe syrin objektiv, por mbi të gjitha, yllin tonë orientues, anëtarësimin e Shqipërisë në BE. Ky mocion me debat, ishte i lidhur me nenin 103, ku thuhet që në fund të debatit miratohet rezoluta. Në fund jemi të detyruar të miratojmë rezolutën, e cila ka kaluar me konsensus. Do të ishte e mirë ta dëgjojmë rezolutën, më pas të çelim debatin.
Të them të drejtën, këto 48 orë, kanë qenë 48 orë të një pune intensive. Të mos ta prishim punën e mirë të Komisionit dhe të vazhdojmë përpara me miratimin”, tha Balla.
