Letonia synon blerjen e raketave “Barracuda” nga Anduril

Letonia ka njoftuar synimin e saj për të blerë familjen e raketave lundruese me motor reaktiv “Barracuda” nga kontraktori amerikan i mbrojtjes, Anduril Industries.

Presidenti Edgars Rinkēvičs e theksoi mundësinë e blerjes së raketave pas një vizite në kompaninë amerikane në Kaliforni dhe një takimi me themeluesin e Anduril, Palmer Luckey.

Zyrtarët nuk kanë bërë të ditur variantin specifik të raketës, sasinë, koston apo afatin kohor të dorëzimit.

Marrëveshja vjen në një kohë kur vendet evropiane të NATO-s po përshpejtojnë përpjekjet për të vendosur në terren armë të lëvizshme me bazë tokësore dhe sisteme kundër dronëve, me qëllim forcimin e parandalimit ndaj Rusisë mes pushtimit të vazhdueshëm të Ukrainës.

Vëzhguesit theksojnë se marrëveshja me Anduril do të zgjeronte aftësitë goditëse të shtetit baltik përgjatë krahut lindor të NATO-s.

Mbështetje për testimet ushtarake vendase
Gjatë vizitës, firma letoneze e mbrojtjes “Origin Robotics” nënshkroi një marrëveshje të veçantë me Anduril për të integruar softuerin e komandës dhe kontrollit “Lattice” të Anduril në sistemin e saj “BLAZE” – një dron autonom përgjues.

Platforma e kombinuar synon të krijojë një rrjet sistemesh kundër mjeteve ajrore pa pilot për qëllime testimi ushtarak në vend.

Raketa Barracuda

E pajisur me sisteme shtytëse nënzanore (subsonike), familja Barracuda përfshin konfigurime për lëshim nga sipërfaqja dhe nga ajri, të afta për të mbajtur mbushje luftarake me peshë mbi 100 paund (45 kilogramë).

Predha ka një rreze veprimi prej më shumë se 500 miljesh detare (926 kilometra) dhe një shpejtësi deri në 500 nyje (575 milje ose 926 kilometra në orë).

Fraksion.com