Zelensky: Trump miratoi transferimin e licencës për raketat Patriot në Ukrainë
Presidenti amerikan Donald Trump ka marrë një “vendim përfundimtar” për t’i dhënë Ukrainës licencat për prodhimin e raketave për sistemet e mbrojtjes ajrore Patriot, u tha gazetarëve të premten, më 25 shtator, presidenti ukrainas Volodymyr Zelensky.
Duke iu përgjigjur një pyetjeje në një grup të përbashkët në WhatsApp me gazetarët, ku bën pjesë edhe “Kyiv Post”, Zelensky tha se Trump e kishte njoftuar për vendimin gjatë takimit të tyre të fundit në Nju Jork, të martën.
Zelensky tha se Trump i kishte thënë: “Po, e kam marrë vendimin përfundimtar. Ukraina do t’i marrë licencat për të prodhuar raketa Patriot”.
Zelensky nuk specifikoi nëse vendimi përfshin raketat përgjuese PAC-2 apo PAC-3.
Raketat PAC-2 prodhohen në SHBA dhe, me licencë, në Gjermani – me një pjesë të tyre të destinuara për Ukrainën duke filluar nga viti 2027 – ndërsa raketat më të avancuara PAC-3 prodhohen vetëm në SHBA dhe Japoni.
Më 23 shtator, Departamenti Amerikan i Shtetit i tha medias gjermane DW se diskutimet po vazhdonin dhe se ende nuk ishte marrë një vendim përfundimtar mbi licencat.
Gjatë një takimi me Zelensky-n në margjinat e samitit të NATO-s në Ankara, më 8 korrik, Trump tha se SHBA-ja do ta autorizonte Ukrainën të prodhonte sisteme të mbrojtjes ajrore Patriot.
“Ne do t’u japim atyre të drejtën për të prodhuar Patriot-ë. Do t’u tregojmë se si ta bëjnë këtë,” tha Trump në atë kohë. “Mendoj se ata mund t’i prodhojnë ato mjaft shpejt.”
Por më vonë, Trump u tërhoq nga ky angazhim. Duke folur në një mbledhje të kabinetit më 31 korrik, ai tha se SHBA-ja nuk kishte rënë dakord për transferimin e teknologjisë dhe se diskutimet po vazhdonin.
Trump argumentoi se Uashingtoni duhet të tregohet i kujdesshëm kur ndan teknologji ushtarake të ndjeshme, sepse marrësit mund ta përdorin atë, në fund të fundit, kundër SHBA-së. Ukraina ka kërkuar leje për të prodhuar në vend raketat përgjuese për sistemin “Patriot”, pasi ky sistem – rezervat e të cilit janë të kufizuara si brenda ashtu edhe jashtë vendit – mbetet një nga të paktët që mund të rrëzojë raketat balistike ruse. Sipas raportimeve, mungesat e regjistruara në muajin korrik bënë që pothuajse tri nga çdo katër raketa balistike të arrinin të depërtonin.
Ndërkohë, Zelensky ka njoftuar për paketa dhe dërgesa të reja të sistemit “Patriot”, duke deklaruar se Ukraina e rriti në 60 për qind shkallën e përgjimit të raketave balistike gjatë një sulmi të kryer gjatë natës midis së mërkurës dhe së enjtes, pa specifikuar se si u arrit ky përmirësim.
Fraksion.com
