Trump i fton të ftuarit e darkës zyrtare të shohin punimet në sallën e ballos së Shtëpisë së Bardhë
Presidenti Donald Trump i ftoi të ftuarit në darkën zyrtare të mbrëmjes së sotme me udhëheqësin kinez Xi Jinping që të shihnin punimet e ndërtimit të sallës së re të ballos në Shtëpinë e Bardhë, duke shtuar se, nëse ajo do të ishte gati, do të mund të merrnin pjesë më shumë njerëz.
“Si një gjest të veçantë për nder të Presidentit Xi dhe Zonjës Peng, dua t’i ftoj të gjithë në sallë të kalojnë përmes asaj perdeje të bukur në fund, te dera; gjithçka është e ndriçuar dhe duket bukur,” tha Trump në Sallën Lindore (East Room). “Mund t’ju them se sonte, nëse do ta kishim atë sallë, do të kishim shumë më tepër se 1.000 njerëz – vetëm në këmbë – ndërsa kjo sallë mban rreth 145.”
“Të gjithë presidentët kanë kërkuar një gjë të tillë për më shumë se 150 vjet dhe së shpejti do ta kenë,” tha Trump, duke shtuar se salla e ballos është “një vit larg përfundimit”.
Trump sugjeroi që të ftuarit t’i shihnin punimet pasi të përfundonte programi artistik.
“Kushdo që dëshiron të hyjë në një kantier ndërtimi që është i pastër dhe shkëlqen, për ne është nder që ta bëni këtë,” tha Trump.
CNN ka raportuar më parë se nën sallën e ballos po instalohet një bunker sigurie tejet i sofistikuar dhe nuk është e qartë nëse ai do të ishte i dukshëm në fazën aktuale të ndërtimit.
Dje, Trump u tha gazetarëve se do të kishte dashur që salla e ballos të kishte përfunduar në kohë për darkën zyrtare me Xi-në.
Gjatë fjalës së tij në darkë, Trump vlerësoi gjithashtu “themelin e tregtisë dhe respektit të ndërsjellë” midis SHBA-së dhe Kinës, duke shtuar se “Presidenti Xi dhe unë e kuptojmë se përfaqësojmë sisteme të ndryshme, por lidhjet mes popujve tanë mbeten të forta”.
“Amerikanët dhe kinezët kanë shkëmbyer gjithmonë mallra, njohuri, zakone dhe ide. Ky ka qenë themeli i tregtisë dhe respektit të ndërsjellë midis vendeve tona dhe së bashku mund të vazhdojmë të ndërtojmë një marrëdhënie që nxit prosperitetin dhe sigurinë për brezat e ardhshëm,” tha Trump.
Ky shkrim është përditësuar me informacione shtesë.
Fraksion.com
