Përshkallëzohet konflikti mes Netanyahut dhe Mamdanit para vizitës në OKB

Pak para udhëtimit të tij në Asamblenë e Përgjithshme të Kombeve të Bashkuara, konflikti mes kryeministrit izraelit Benjamin Netanyahu dhe kryetarit të bashkisë së Nju Jorkut, Zohran Mamdani, është ndezur sërish.

Të martën, Netanyahu publikoi një video në rrjetet sociale ku akuzonte Mamdanin se mbështet Hamasin dhe se “nxit trazira kundër hebrenjve të Nju Jorkut”. Netanyahu deklaroi se do të vinte në OKB “për të thënë të vërtetën rreth ushtarëve tanë heroikë dhe për të thënë të vërtetën rreth jush”. Netanyahu e ka përdorur tashmë Mamdanin në fushatën e tij zgjedhore, përmes një billbordi ku shkruhej: “Ata duan që Netanyahu të humbasë. Mos i lini të fitojnë.”

Një ditë më parë, Mamdani i intensifikoi kritikat ndaj Netanyahut, duke e quajtur atë kriminel lufte, ndonëse pranoi se nuk kishte autoritetin për ta arrestuar liderin izraelit gjatë qëndrimit të tij në Nju Jork – një veprim që ai kishte premtuar ta kryente gjatë fushatës së tij për kryetar bashkie. Gjykata Ndërkombëtare Penale lëshoi ​​një urdhër-arresti për Netanyahun dhe liderë të tjerë izraelitë në vitin 2024, por SHBA-ja nuk është anëtare e kësaj gjykate dhe e ka bërë të qartë se nuk do ta arrestojë Netanyahun.

Netanyahu dhe Mamdani kanë një rivalitet të gjatë dhe shumë publik. Ardhja e Netanyahut në Nju Jork për fjalimin e tij në Asamblenë e Përgjithshme të OKB-së, të enjten, pritet të nxisë protesta.

Fraksion.com