Sondazhet godasin Putinin: Një në tre rusë janë të pakënaqur me politikat ekonomike
Problemet ekonomike të Rusisë po shkaktojnë pakënaqësi sociale gjithnjë e më të përhapura, me një të tretën e publikut të pakënaqur me politikat ekonomike të Presidentit Vladimir Putin, ka treguar një sondazh i ri.
Sanksionet perëndimore, përshkallëzimi i kostove të luftës dhe sulmet me dronë ukrainas me rreze të gjatë veprimi në infrastrukturën energjetike kanë lënë gjurmë në ekonominë e Rusisë.
Një në tre rusë tani kanë shprehur pakënaqësi me politikat ekonomike të Putinit në një sondazh të kohëve të fundit nga Qendra e Strategjive të Reja Euroaziatike (NEST) – një grup ekspertësh perëndimor i fokusuar në çështjet politike dhe ekonomike ruse.
Më shumë se një e treta e të anketuarve thanë se ekonomia është përkeqësuar gjatë tre muajve të fundit, ndërsa një në pesë kishte një përshtypje negative për ekonominë në tërësi.
Pakënaqësia ishte më e lartë midis grupeve me të ardhura të ulëta, njerëzve të moshës midis 45 dhe 65 vjeç dhe atyre që mbështeten në mediat sociale për lajmet e tyre.
Vlerësimi më optimist për ekonominë e Rusisë erdhi nga grupmosha 18-24 vjeç, ata me të ardhura më të larta, banorët e Moskës dhe ata që përdorin mediat tradicionale për lajmet e tyre.
Kreu i ekonomisë i Qendrës NEST, Sergey Aleksashenko, i cili është ish-nënkryetar i bankës qendrore ruse dhe shërbeu si zëvendësministër i financave nga viti 1993 deri në vitin 1995, tha në raport se situata duket gjithnjë e më e zymtë për Putinin.
“Deri më tani, Putini ka qenë i suksesshëm në mbrojtjen e publikut nga ndikimet e luftës në Ukrainë, por rënia e vazhdueshme ekonomike do ta bëjë këtë më të vështirë,” tha ai.
“Shifrat zyrtare tregojnë se kënaqësia me politikën ekonomike të Rusisë është bërë negative për herë të parë që nga viti 2022 dhe aktualisht është në nivelin e momenteve të tjera të rëndësishme të trazirave në historinë e kohëve të fundit ruse”, vazhdoi Aleksashenko.
‘Shpërthim social’
Rezultatet e sondazhit, të publikuara më 9 qershor, përkuan me një paralajmërim të ashpër nga një ligjvënës rus se vendi përballet me një “shpërthim social” për shkak të rritjes së kostove, rënies ekonomike dhe një sërë skandalesh korrupsioni publik.
Vyacheslav Markhaev, një deputet i Partisë Komuniste, sulmoi ashpër në një postim në Telegram Putinin dhe udhëheqjen e Kremlinit, duke i akuzuar ata se po pasurohen ndërsa shumica vuan.
“Xhepat e zyrtarëve qeveritarë dhe atyre pranë elitës nuk po zbrazen”, postoi Markhaev. “Numri i miliarderëve rusë arriti një rekord të lartë… vetëm oligarkët dhe rrethinat e tyre – më pak se 5% e popullsisë – mund të mburren me zhvillim.”
Por Aleksashenko i Qendrës NEST nuk i sheh trazirat sociale si të afërta.
“Nuk ka asnjë thirrje koherente për një ndryshim në qasje, e lëre më për ndryshim regjimi, që do ta bënte Kremlinin nervoz”, tha ai. “Ata [Kremlini] e shohin këtë si ankesë publike dhe jo si diçka më serioze, dhe Putini ka qenë në gjendje të rikuperohet nga pozicione të ngjashme ekonomike në të kaluarën.”
Frakdion.com
