I dënuar me 15 vite burg, arrestohet në Itali 42-vjeçari shqiptar

Policia e Shtetit bëri sot me dije se është arrestuar një 42-vjeçar shqiptar në Itali, i dënuar me 15 vite burgim për trafikim të qenieve njerëzore.

Policia njofton se gjatë operacionit të koduar “The Wanted”, si rezultat i koordinimit të informacioneve dhe veprimeve operacionale ndërmjet specialistëve të Interpol Tiranës dhe specialistëve të Interpol Romës, u arrestua në Itali, me qëllim ekstradimin në Shqipëri, shtetasi Sefer Selimaj alias Ani Ibraliu, 42 vjeç.

Në njoftim thuhet se ky shtetas ishte në kërkim ndërkombëtar, pasi Gjykata e Apelit, Tiranë, në vitin 2017, e ka dënuar me 15 vjet burgim, për veprën penale “Trafikimi i qenieve njerëzore”. Nga dënimi, 42-vjeçarit i kanë mbetur për të vuajtur 13 vjet, 10 muaj dhe 19 ditë burgim.

Policia e Shtetit njofton se vijon bashkëpunimi me Interpol Romën, për të finalizuar procedurën për ekstradimin e 42-vjeçarit, në Shqipëri.

Fraksion.com