Çmimet e naftës rriten pasi Trump refuzon propozimin e paqes të Iranit

Çmimet e naftës po rriten sot, pasi Presidenti i SHBA-së Donald Trump hodhi poshtë kushtet e fundit të Iranit për t’i dhënë fund luftës, duke shkaktuar frikën e një përshkallëzimi të ri në konflikt që do ta mbante të mbyllur Ngushticën jetike të Hormuzit për një kohë edhe më të gjatë.

Nafta e papërpunuar Brent, standardi global i naftës, u rrit me 2.9% në 104.2 dollarë për fuçi. WTI, standardi amerikan, u rrit me 2.4% në 97.7 dollarë për fuçi.

Trump tha se propozimi i fundit i paqes i Iranit ishte “krejtësisht i papranueshëm”, në një postim në Truth Social të dielën. Teherani dëshiron që sovraniteti i tij mbi Ngushticën e Hormuzit të njihet dhe gjithashtu ka kërkuar kompensim për dëmet e luftës, sipas mediave shtetërore iraniane.

Komentet e Trump “shtyjnë në drejtim të ripërshkallëzimit – potencialisht më shumë të shtëna – por mendoj se do të ketë një degë të re ulliri”, shkroi në një shënim Neil Wilson, një strateg në bankën Saxo.

Çmimet e naftës bruto janë rritur me rreth 45%, ose rreth 30 dollarë për fuçi, që nga fillimi i luftës, duke bllokuar një rrugë ujore që zakonisht është një kanal për rreth një të pestën e furnizimit global me naftë dhe gaz natyror në botë.

Ndërsa disa prodhues, përfshirë Arabinë Saudite dhe Emiratet e Bashkuara Arabe, kanë gjetur rrugë alternative për eksportet e tyre, rreth 10-12 milionë fuçi naftë bruto mbeten të bllokuara nga tregjet globale në ditë, sipas analistëve.

“Ne ende mendojmë se po shkojmë drejt një marrëveshjeje, por të dyja palët duan të kenë një dorë të fortë në negociata”, shkroi në një shënim kryeekonomisti evropian në Jefferies, Mohit Kumar. “Sa më gjatë të mbetet i mbyllur Ngushtica e Hormuzit, aq më negative është për ekonominë globale.”

Fraksion.com