U nda nga jeta në moshën 89-vjeçare: Homazhe për ish-kreun e Kuvendit, politika nderon Servet Pëllumbin

Sot mbahen homazhe në nder të Servet Pëllumbit. Homazhet nisën në orën 09:30 dhe në orën 12:00 mbahen homazhet zyrtare.

Në homazhe kanë marrë pjesë politikanë, figura të njohura, të cilët kanë vlerësuar shembullin dhe figurën e Pëllumbit në politikën shqiptare.

Arkmorti mbërriti në sheshin Skënderbej, në orën 09:00 dhe u vendos në hollin e Teatrit të Operas dhe Baletit.

Ndërsa në orën 12:30 do të mbahet ceremonia e përcjelljes drejt banesës së fundit.

Servet Pëllumbi ka lindur në Korçë dhe pas viteve 90, ai ka kandiduar në këtë zonë elektorale.

Pëllumbi u diplomua për studimet e larta në Universitetin e Petersburgut me titullin doktor i shkencave në Letërsi.

Gjithashtu ai është autor i dhjetëra librave dhe studimeve në filozofi, politikë dhe demokraci.

Nga viti 1960 – 1963, ai punoi si pedagog në Institutin Pedagogjik në Korçë dhe më pas e ushtroi këtë profesion deri më 1977.

Që nga ky vit, politikani është zgjedhur anëtar i Komitetit Drejtues së Partisë së Punës, teksa për gati tre vite ka qenë pedagog në Universitetin e Tiranës.

Ndryshimet demokratike në vitin 1990, e pozicionuan Servet Pëllumbin në postin e nënkryetarit të PS, post që e mbajti deri në vitin 1996.

Pëllumbi është një nga themeluesit e Partisë Socialiste dhe ish-kryetar i Kuvendit. Ai është konsideruar një nga figurat më me integritet që pas viteve ’90.

Ai ka udhëhequr fushatën e socialistëve, për të kundërshtuar referendumin për Kushtetutën dhe më pas fushatën për lirimin e Fatos Nanos nga burgu.

Njihet si një nga deputetët më jetëgjatë të Kuvendit të Shqipërisë, me pjesëmarrje aktive në komisionet e ndryshme parlamentare.