Berisha: Do çlirojmë bizneset nga barra e madhe fiskale

Kryetari i Partisë Demokratike, Sali Berisha deklaroi sot se Partia Demokratike në programin e saj parashikon uljen e barrës fiskale për bizneset, duke u dhënë atyre hapësirën për investime.

“Ne do çlirojmë bizneset nga barra e madhe fiskale, se ne besojmë se paratë në kontot e bizneseve janë më të vlefshme se në llogaritë e qeverisë. Në këtë mënyrë ata do të kenë mundësi, kursimet t’i investojnë, të krijojnë vende pune, të zgjerojnë biznesin”, deklaroi Berisha në takimin e mbajtur sot me banorë të degës nr.2.

Sipas tij, PD do të bëjë gjithçka që Shqipëria të prodhojë kudo, në çdo skaj të saj, në mënyrë që të mirat të shndërrohen në pasuri për qytetarët.

“Një Shqipëri që prodhon është një Shqipëri që gëzon dhe begaton qytetarët e vet”, tha Berisha duke shtuar se vendi nuk mund të integrohet në BE me pensione 140 euro, apo ku bëhen arrestime politike.

“Kjo parti qëndroi në pushtet 20 vjet, dhe në mënyrë absolute nuk ka regjistruar një akt të vetëm madhor në procesin e integrimit. PD e anëtarësoi Shqipërinë në Këshillin e Europës. Këta thërrisnin se, molla nuk është pjekur, në atë kohë. PD anëtarësoi Shqipërinë në NATO. Parlamenti Europian miratoi heqjen e vizave për shqiptarët”, u shpreh Berisha.

Q“Nëse ka një parti që ka ADN-në e saj integrimin, vijoi Berisha, kjo është PD-ja”.

“Po PD-ja e integrimit nuk e imagjinon kurrë se mund të integrojë Shqipërinë si vend i burgosjeve dhe arrestimeve politike. Shqipëria nuk mund të integrohet kurrë si vend i tillë”, tha ai.

“Shqipëria, nuk mund të ecë drejt BE duke eksportuar krim dhe kriminalitet, duke dhunuar zgjedhjet e lira. Pra, të gjitha këto janë vetëm mashtrime të Edi Ramës. Nëse, ka një forcë politike që është faktuar se është serioze dhe e suksesshme në proceset integruese, kjo është PD”, deklaroi Berisha.

Fraksion.com