Berisha: PD lufton për proces ligjor të drejtë, SPAK u kthye në organizatë politike

Kryetari i Partisë Demokratike, Sali Berisha deklaroi sot se Partia Demokratike ka kaluar përmes një kalvari të padëgjuar ndonjëherë pasi, sipas tij, luftoi për ekzistencë.

Gjatë një interviste në medie, Berisha foli për programin e PD-së, ashtu sikurse dhe për kandidatët.

Berisha tha se PD nuk ka luftuar dhe nuk lufton për shkrirjen e SPAK-ut dhe as për largimin e Dumanit. Por theksoi ai, për të drejtën e qytetarëve dhe për proces ligjor të drejtë, që sot, vijoi ai, nuk e ka.

“Sot një qytetar duhet të presë 15 vite për një proces civil në të gjitha shkallët. Ky fakt është me pasoja të rënda jo vetëm për qytetarët. Kushton miliona euro, që lidhen me proceset për pronat, investimet e huaja, etj. Në aspektin politik, kjo organizatë politike ka arrestuar tre liderë të partive opozitare në një vit zgjedhor, njëlloj si në Tunizi”, deklaroi Berisha.

Berisha foli dhe për atë që PD do t’u ofrojë qytetarëve nëse do të fitojë zgjedhjet e 11 majit.

“Një Shqipëri që prodhon, sepse kjo Shqipëri punëson, gjeneron mirëqenie, jep siguri. Sigurojmë lirinë ekonomike të individit, barazi në shanset ekonomike, konkurrencë të ndershme, barrë të ulët fiskale, qeveri të vogël, shkurtim procedurash”, u shpreh ai.

Po ashtu, Berisha foli për rritje pagash, të cilat sipas tij, nuk do të rëndojnë biznesin, pasi ata do të kenë ulje të barrës fiskale.

“Do të presim aortat e kanaleve të zeza të narkodrgës”, deklaroi më tej Berisha.

Më tej, kreu i PD-së u ndal dhe në listën e kandidatëve për deputetë në zgjedhjet e përgjithshme parlamentare të 11 majit.

Ai shpjegoi se disa prej emrave që janë në listë të mbyllur luftuan për ekzistencën politike të partisë jashtë kontrollit të Edi Ramës.

“Këta njerëz u rreshtuan në krahun e ekzistencës së një partie politike jashtë kontrollit të Edi Ramës, ambasadës apo tjetër kujt. Flamur Noka, Oerd Bylykbashi, Albana Vokshi, Belind Këlliçi, Besart Xhaferri, Edmond Spaho, Ivi Kaso e një grup i tërë u përballën ama në zgjedhjen e tyre. Zgjodhën të mbështesnin një kauzë që zgjodhi Berisha. Pa mbështetjen e këtyre individëve, PD-ja nuk do ishte kurrë një forcë siç është sot, por një shtojcë, një fasadë e opozitës”, tha Berisha.

Sipas tij, opozita sovrane nuk është çështje partie, por themelore e pluralizmit.

Kreu i PD-së foli dhe për LaCivita, këshilltarin e Presidentit të SHBA-së, në zgjedhjet e nëntorit, i cili po mbështet PD-në në këto zgjedhje.
Berisha deklaroi se ai do të jetë për pak ditë në Tiranë, në kohën kur do të hapet fushata dhe se komunikimet me të janë të vazhdueshme.

Gjithashtu, Berisha theksoi se Lacivita nuk është marrë me lobimin për heqjen e “nongratës”.

Berisha u ndal dhe në arritjet gjatë 8 viteve të qeverisjes së tij 2005-2013.

“U arrit lëvizja e lirë e qytetarëve, vendi u anëtarësua në NATO. Qeveria luftoi korrupsionin. U vendosën rregulla. Me një buxhet sa gjysma e këtij që është sot u ndërtuas infrastruktura. Arsimi filloi të rritet sipas Pisas, sot ai është në rënie. Iu bë një luftë krimit të organizuar. Investimet e huaja u rritën 300 dhe 320 % dhe u krijua mjedis miqësor për biznesin”, deklaroi Berisha.

Njëkohësisht, theksoi ai, u bë investimi më rentabël në historinë e këtij vendi që ishte “Rruga e Kombit”.

“Ajo rrugë i ka sjellë vendit 300-400 milionë euro e më shumë çdo vit. Tirana e Prishtina lidheshin për 8-10 orë. Mijëra apartamente janë blerë dhe vijojnë të blihen nga shqiptarët e Kosovës. Ajo rrugë në një farë mënyrë bashkoi një komb të ndarë në kuptimin shpirtëror 46 vite”, tha Berisha.

 

Fraksion.com