Lavrov: Rusia nuk do të pranojë trupa paqeruajtëse evropiane në Ukrainë. Përjashton ngrirjen e konfliktit sipas linjave aktuale
Ministri i Jashtëm rus Sergei Lavrov ka folur sot në një konferencë shtypi në Katar.
Për dislokimin e mundshëm të trupave paqeruajtëse evropiane në Ukrainë, ai thotë se Rusia nuk e konsideron këtë një opsion dhe se këto bisedime kanë për qëllim “të nxisin më tej konfliktin”, sipas agjencisë së lajmeve Reuters.
Lavrov gjithashtu i përshkruan diskutimet si “bisedë boshe” dhe një “mashtrim”, që synon “pompimin e Ukrainës me armë”.
Presidenti amerikan Donald Trump tha të martën se do të kishte nevojë për “një formë paqeruajtjeje” në Ukrainë pas një marrëveshjeje paqeje, pasi tha të hënën se Rusia ishte e hapur për të pranuar paqeruajtës evropianë në Ukrainë.
Ministri i Jashtëm rus Sergei Lavrov përjashton ngrirjen e vijës së konfliktit në pozicionin e saj aktual dhe sugjeron që forcat ruse do të vazhdojnë të luftojnë të paktën derisa të kapin të katër rajonet ukrainase që Moska i pretendon si të sajat.
“Disa thonë – OK, le ta lëmë linjën e kontaktit aty ku është, kjo pjesë është ruse dhe ajo është ukrainase. Së pari, nuk po ndodh – ne kemi një kushtetutë të bazuar në shprehjen e vullnetit të njerëzve,” tha Lavrov në një konferencë shtypi. Ai shtoi se “ajo që ka mbetur nga Ukraina” duhet të lirohet nga ato që ai i përshkroi si ligje “raciste”.
Sipas kushtetutës ruse, rajonet Donetsk, Luhansk, Kherson dhe Zaporizhzhia janë pjesë e Rusisë edhe pse forcat e Moskës nuk i kontrollojnë plotësisht ato.
Fraksion.com