“Le të rrijë e qetë Elisa me shokët e shoqet e saj”, përjashtohen 3 deputetë, Hoxha: Kallëzim penal!
Kryetarja e Kuvendit, Elisa Spiropali përjashtoi sot nga seanca plenare e Kuvendit deputetët e Partisë Demokratike, Elda Hoti dhe Petrit Doda. Po ashtu u përjashtua dhe deputeti i Partisë për Drejtësi, Integrim dhe Unitet, Gëzim Ademaj.
Deputetja e PD, Elda Hoti ka hedhur lëndë mbi deputetët e mazhorancës. Ata gjithashtu krijuan kaos në seancë duke vendosur karriget e deputetëve tek foltorja e Kuvendit.
Deputeti i PDIU, Gëzim Ademaj, mblodhi karriget para foltores, Elda Hoti nxori dy shishe duke spërkatur tapetin e parlamentit, kurse Petrit Doda bllokoi foltoren dhe sulmoi kolegët, duke penguar seancën.
“Zonja Hoti ndalni aktet tuaja të rënda. Herën e kaluar keni ardhur në parlament me benzinë në çantë. Është vepër penale. Ju keni bërë një krim. Mos provokoni, mos cenoni, mos dhunoni deputetët. Deputetët ndihen të cenuar nga ju. Këto janë aktet dhune të papranueshme. Ju lutem dilni jashtë nga seanca. Ju keni rrezikuar jetën e deputetëve. Zoti Doda ju po rrezikoni jetën e deputetëve në këtë sallë. Jeni e përjashtuar nga seanca. Për veprat tuaja ka kallëzim penal. Me ju do të merret Prokuroria. SPAK duhet të merret me ju, jo kjo sallë. I lutem Gardës të verifikojë se çfarë ishte materiali që u hodh mbi deputetët”, tha Spiropali.
Ndërsa ministri i Brendshëm, Ervin Hoxha u shpreh se Garda e Republikës po kryen detyrën sipas ligjit. “Dëshiroj të informoj opinionin publik se këtu nuk bëhet fjala për deputetët që janë përjashtuar dhe hyrjen e tyre. Garda e Republikës është duke kryer detyrën. Një pjesë e juaja nuk po i përmbahet rregullave dhe regjimit të kontrollit të brendshëm. Atëherë këtu bëhet fjalë për zjarrvënie të qëllimshme, të gjitha provat do të fiksohen dhe do të bëjmë një kallëzim penal drejtuar Prokurorisë”, tha Hoxha.
Deputetja e PD, Elda Hoti, në dalje të sallës së seancave plenare u shpreh se lënda e hedhur nuk rrezikon jetën e ligjvënësve në Kuvend.
“Le të rrijë e qetë Elisa me shokët e shoqet e saj. Ajo që hodha ishte një aromatizues. Nuk ishte benzinë. Nuk i trembem as SPAK-ut askujt, Ne kemi një mision dhe nuk ndalemi nga kërcënimet e kësaj bande kriminale”, tha ajo.
“Nuk ka asnjë të drejtë Garda e Republikës që të bëjë kontroll fizik të deputetëve. Nuk mundet që Garda e Republikës me urdhër të Elisa Spiropalit që të dhunojë gratë. Këta që burgosin deputetin vetëm sepse denoncon aferat e tyre të lidhura me qeverinë.
Ajo çfarë hodhëm në parlament nuk ishte asgjë që mund t’i rrezikojë jetën deputetëve. Ishte aromatizues le ta verifikojë prokuroria e SPAK e të gjithë me radhë. Unë nuk i trembem as SPAK as askujt. Kemi mision të mbrojmë të drejtën e qytetarëve shqiptarë”, theksoi Hoti në një prononcim për mediet.
Kuvendi u mblodh sërish sot në seancë plenare, ndërsa deputetët e përjashtuar të opozitës nga Komisioni i Etikës, tentuan futjen me dhunë në seancë.
Për të shmangur përplasjen mes deputetëve, Garda e Republikës kishte rrethuar me gardh metalik hyrjen e Kuvendit. Kjo solli edhe përplasje mes deputetëve të Partisë Demokratike dhe punonjësve të Gardës së Republikës.
Kujtojmë se Komisioni i Etikës ka përjashtuar 24 deputetë të opozitës pas djegies së karrigeve dhe kaosit në seancën e 30 shtatorit.
Fraksion.com
