Ndërron jetë presidenti i Parlamentit Evropian, David Sassoli

Sassoli është dërguar në spital me 26 dhjetor. Prej asaj kohe janë anuluar të gjitha takimet e tij zyrtare. Në shtator Sassoli ishte për trajtim në një spital për pneumoni dhe nuk ishte në gjendje të kryente detyrat e tij si President i Parlamentit të BE-së për disa javë. Sassoli ka pasur edhe leukemi një herë më parë.

Kryetar parlamenti prej vitit 2019   

Socialdemokrati ishte president i Parlamentit që nga zgjedhjet evropiane të vitit 2019. Mandati i tij ka përfunduar këtë muaj në gjysmë të periudhës legjislative, siç u ra dakord nga krerët e shteteve dhe qeverive të BE-së. Sassoli ka njoftuar më parë se nuk do të rikandidonte për këtë post. Pasardhësi apo pasardhësja e tij është dashur të zgjidhet javën që vjen në një seancë plenare të Parlamentit në Strasburg.

Menjëherë në mëngjes kanë shprehur ngushëllime shumë politikanë italianë dhe evropianë. “Ciao David, mik i përjetshëm”, shkruan ministri italian i Kulturës, Dario Franceschini. Komisioneri i BE-së për Klimën, Frans Timmermans shprehu ngushëllimet e tij për familjen e politikanit. “Ngrohtësia e tij ishte një frymëzim për të gjithë ata që e njihnin. Ngushëllimet e mia të sinqerta shkojnë për familjen dhe të dashurit e tij”, ka shkruar holandezi në Twitter.

Sassoli ka lindur më 30 maj 1956 në Firence, Toscana. Pas studimeve për shkencat politike, ai punoi si gazetar, fillimisht për gazetat dhe agjencitë e lajmeve dhe më pas për radion publike italiane. Ai u shndërrua shpejt në një fytyrë të njohur për miliona italianë, kur mori detyrën e prezantuesit të lajmeve të mbrëmjes në Rai Uno. Në vitin 2007 ai u bë edhe zëvendësdrejtor i programit të lajmeve TG1.

Në vitin 2009 ai u zgjodh në Parlamentin e BE-së, në listën e Partisë Demokratike Socialdemokrate (PD). Nga viti 2014 ai u zgjodh një nga 14 nënkryetarët e Dhomës së Deputetëve të BE-së. Përveç punës së tij parlamentare, Sassoli vazhdoi të shkruante si autor librash, e ka shkruar edhe për gazeta dhe revista.

Ngritja e tij në postin e Presidentit të Parlamentit të BE-së si pasardhës i bashkëkombasit të tij konservator Antonio Tajani ishte e befasishme për shumë njerëz, pasi Italia kishte asokohe dy poste të tjera kryesore në 2019, me kryeministrin aktual në Romë, Mario Draghi, si kreu i Bankës Qendrore Evropiane dhe Federica Mogherini si përfaqësuese e jashtme e BE-së. Sassoli e bëri të qartë se ai e shihte zgjedhjen e tij si një shenjë të pavarësisë së Parlamentit në luftën për pushtet mes qeverive të shteteve të BE-së. Sassoli ishte, ndër të tjera, një kritik i politikës së migracionit të shumë vendeve anëtare.

Aktivitetet e fundit në PE

Sassoli në dhjetor të vitit 2021 mori pjesë në dorëzimin e çmimit Saharov, i cili iu dha Daria Navalny, vajzës së fituesit të çmimit Alexej Navalny dhe të besuarit të tij Leonid Volkov.  “Presidenti”, i cili shpesh fliste në italishten e tij amtare, i drejtonte debatet parlamentare me dorë të ashpër, por pa kritika verbale. Mandati i tij dyvjeçar e gjysmë u shënua nga pandemia e Coronës. Ai ishte i detyruar të koordinonte shumë gjëra përmes internetit dhe rrjeteve. Por aftësitë e tij organizative bënë që ai të fitonte edhe respektin e deputetëve.

Në shenjë solidariteti në mes të krizës, ai vuri në dispozicion ambientet e Parlamentit Strasburg dhe Bruksel për të përgatitur ushqime për familjet në nevojë dhe për të ngritur një qendër testimi për COVID-19. Sassoli ka lënë pas vete dy fëmijë. “Data dhe vendi i varrimit do të publikohen më vonë”, shkroi zëdhënësi i Sassolit në Twitter./dw