Hapet për qarkullimin e automjeteve një tjetër aks i Unazës së Madhe të Tiranës; Hapet në fund të marsit tuneli i tretë

Ministrja e Infrastrukturës dhe Energjisë, Belinda Balluku si dhe kreu i Autoritetit Rrugor Shqiptar, Ergys Verdo inspektuan sot këtë aks.

Kreu i ARRSH-së, Verdho tha se lidhja e lotit të parë të Unazës së Madhe me mbikalimin e Farkës do të bëjë shfryrjen e trafikut për të gjithë zonën.

Sipas tij, ka nisur puna për projektimin e loteve 4, 5, 6, që do të jenë lote shumë të rëndësishme për të bërë ndërlidhjen e kësaj unaze të re dhe sheshit “Shqiponja”, ku po punohet me ritme të shpejta.

Ministrja informoi se në fund të muajit mars do të hapet edhe tuneli i tretë që do të përthithë trafikun që vjen nga Durrësi për t’u futur në unazën e re.

“Jemi drejt përfundimit të disa veprave dhe hapjes së kantiereve të reja që do të përmbyllin aksin më të rëndësishëm në kryeqytet, atë të Unazës së Madhe”, u shpreh ministrja.

Ministrja shtoi se po mundohemi t’u japim zgjidhje sa më shumë akseve rrugore që janë kryesore dhe mbajnë ngarkesën më të madhe të trafikut në Tiranë.

Kreu i ARRSH-së vuri në dukje se shumë shpejt do të buxhetohet edhe loti i 4-t dhe i 5-të i Unazës Lindore që fillon nga rrethrrotullimi i Shkozës deri tek IKV.

“Këto dy lote do të bëjnë të mundur lehtësimin e Rrugës së Dibrës dhe IKV-së. Sot janë dy rrugët më të ndërlikuara me trafik”, tha Verdho.