SHBA do të bëjë gjithçka që Maqedonia dhe Greqia të gjejnë zgjidhje për emrin

Forumi i tetë me radhë To Be Secure (2BS), konferenca ndërkombëtare e cila trajton çështjet e sigurisë globale dhe transatlantike, sot zyrtarisht u hap në Budvë të Malit të Zi. Tema qendrore e forumit të sivjemë është situata politike dhe e sigurisë në Ballkanin Perëndimor.

Forumi diskuton edhe rreth ndryshimit në rritje të politikës evropiane kah e djathta dhe gjithashtu bisedohet edhe për politikën e jashtme të SHBA-ve, nën udhëheqjen e Donald Trump.

Kryeministri i Malit të Zi, Dushko Markoviç, i cili hapi konferencën tha se Mali i Zi është në një rrugë të pakthyeshme dhe të qëndrueshme si anëtar i ardhshëm i BE-së, por se Ballkani ende mbetet “një punë e pambaruar”.

Ai shtoi se forumi i këtij viti është ndryshe nga ato të mëparshmit, sepse Mali i Zi midis dy ngjarjeve u bë anëtar i NATO-s.

Duke folur për situatën në rajonin e Ballkanit Perëndimor, Markoviç shprehu shpresën se samiti i ardhshëm i NATO-s në Bruksel do të sjellë momente të reja pozitive në rajon.

“Ne presim me padurim një zhvillim të favorshëm midis Shkupit dhe Athinës për zgjidhjen e mosmarrëveshjes për emrin, e cila do të hapte rrugën e Maqedonisë drejt anëtarësimit. Ne shpresojmë se së shpejti do të gjeni një modalitet për aktivizimin e MAP-it (Plani Aksional për Antarësim në NATO) për Bosnjë e Hercegovinën, e cila do ti jep një energji të re procesit euroatlantik në Bosnjë e Hercegovinë. Ne po ashtu e mbështesim bashkëpunimin që Serbia ka me NATO-n përmes mekanizmave të partneritetit si dhe ndërveprimit midis NATO-s dhe Kosovës. Prandaj, jemi të kënaqur, kohët e fundit, me një interes të përtërirë në rajon nga të gjitha adresat e rëndësishme, nga Brukseli deri në Washington”, tha Markoviç.

Në Forumin 2BS të pranishëm janë një numër i madh i zyrtarëve nga rajoni, por edhe më gjerë.

Matthew Palmer, ushtrues detyre Zëvendës Ndihmës Sekretari në Departamentin e Shtetit, tha se qëllimi i SHBA-ve është që vendet e rajonit të arrijnë qëllimin e tyre të përbashkët, pra integrimin evropian dhe euroatlantik.

Ai komentoi edhe situatën në vendet e rajonit.

“Në Maqedoni, një zgjidhje e pranueshme nga të dy palët është më afër se më parë. Mendoj rreth mosmarrëveshjes së emrit. Megjithatë, ende ka shumë punë. Të dyja palët, Greqia dhe Maqedonia kanë treguar se mund të punojnë së bashku. Tani është koha e duhur, ky është një moment historik dhe SHBA-të do të bëjnë gjithçka për të mbështetur të dy palët në arritjen e marrëveshjes. Shqipëria poashtu ka përshkuar një rrugë të gjatë. BE-ja ka rekomanduar që negociatat të hapen dhe kjo pasqyron gatishmërinë e liderëve të këtij vendi për të kryer reformat në luftën kundër krimit të organizuar dhe korrupsionit”, tha zyrtari amerikan.

Kur është fjala për BeH, ai shprehu shqetësime.

“Ka shumë sfida në BeH, është shqetësuese retorika nacionaliste. Disa politikanë bëjnë manovra të vërteta për të ruajtur gjendjen aktuale. Paaftësia dhe mossuksesi i udhëheqësve e largojnë BeH-në nga rruga drejt integrimit evropian. Sa i përket sigurisë, SHBA, së bashku me partnerët e saj, dëshiron të mbështesë aspiratat e BeH-së drejt NATO-s”, tha Palmer./Anadolu Agency

Fraksion.com