“Me ne një shans i jashtëzakonshëm“, Spiropali: E sollën Shqipërinë para dyerve të Bashkimit Europian

Drejtuesja politike e PS për qarkun Tiranë, Elisa Spiropali, vijon intensivisht takimet elektorale në kuadrin e zgjedhjeve të 11 majit.  Në takimin e organizuar paraditen e sotme me qytetarë të Golemit ishin edhe kandidatët Ilva Gjuzi, Pandeli Majko dhe Eldi Çepeli, ndërsa në takimin e pasdites me qytetarë të Rrogozhinës ishin kandidatët Pandeli Majko dhe Antonela Dedej.

“Ekipi ynë për Kavajën dhe Rrogozhinën është një ekip kompakt që rrezaton punë dhe përkushtim për njerëzit.

Beteja për mandatin e katërt qeverisës është më thelbësorja dhe më e rëndësishmja, sepse është beteja mes nesh që po e çojmë Shqipërinë në Bashkimin Europian dhe atyre që duan ta kthejnë në baltën ku ishte para 12 vjetësh.

Me ne Shqipëria po shkon drejt familjes europiane, e cila nuk të le kurrë vetëm dhe është një shans i jashtëzakonshëm për të gjithë shqiptarët, fermerët, studentët, njerëzit e thjeshtë dhe komunitetet.

Ne e sollën Shqipërinë para dyerve të Bashkimit Europian dhe kjo nuk ishte as një fushë me lule dhe as një rrugë e shtruar me tapet të kuq, por një betejë për të lartësuar prestigjin e vendit tonë, që e mundësoi vetëm qeverisja e PS dhe Edi Ramës. Ne fituam besimin e njerëzve dhe po ua kthejmë atyre me punë, arritje dhe dinjitet.”, theksoi Spiropali.

Fraksion.com