Lufta në Iran, Starmer – Zelensky-t: Fokusi duhet të mbetet te Ukraina
Kryeministri i Mbretërisë së Bashkuar Keir Starmer i tha Presidentit ukrainas Volodymyr Zelensky në Londër të martën se “fokusi duhet të mbetet te Ukraina” pavarësisht luftës SHBA-Izrael me Iranin.
Starmer e mirëpriti Zelensky-n në rezidencën e tij zyrtare në Downing Street për bisedime pasi udhëheqësi i Ukrainës u takua me Mbretin Charles III në Pallatin Buckingham.
“Mendoj se është me të vërtetë e rëndësishme që të jemi të qartë se fokusi duhet të mbetet te Ukraina”, tha Starmer.
“Padyshim që po zhvillohet një konflikt në Iran, në Lindjen e Mesme, por nuk mund ta humbasim fokusin nga ajo që po ndodh në Ukrainë dhe nga nevoja për mbështetjen tonë”, shtoi ai.
Uashingtoni ka hequr pjesërisht sanksionet kundër Moskës për të qetësuar çmimet e naftës të rritura nga lufta në Lindjen e Mesme, e cila duket se ka prishur bisedimet e udhëhequra nga SHBA-të për t’i dhënë fund pushtimit katërvjeçar të Rusisë.
Takimi i së martës erdhi pasi Downing Street kishte njoftuar më parë se Britania dhe Ukraina janë gati të nënshkruajnë një partneritet mbrojtës që synon të adresojë kërcënimin e dronëve me kosto të ulët.
Vizita e Zelensky-t në Londër – përpara një udhëtimi në Spanjë të mërkurën – vjen ndërsa aleatët e tij evropianë janë zotuar të vazhdojnë mbështetjen për Kievin në konfliktin me Rusinë.
“Vendosmëria jonë është e pathyeshme”, tha Starmer, duke përsëritur mbështetjen e gjatë të Mbretërisë së Bashkuar për Ukrainën.
Më parë, Zelensky dhe Mbreti Charles shtrënguan duart gjatë një audience private në Pallatin Buckingham.
“Falënderoj Madhërinë e Tij dhe të gjithë Familjen Mbretërore për mbështetjen dhe solidaritetin e tyre të palëkundur me Ukrainën”, shkroi Zelensky në X.
Udhëheqësi ukrainas do të takohej më vonë me shefin e NATO-s Mark Rutte në Londër, tha zëdhënësi i tij.
Ai pritej gjithashtu t’u drejtohej anëtarëve të parlamentit të Mbretërisë së Bashkuar.
Fraksion.com
