Opozita bojkotoi seancën parlamentare, PD reagim zyrtar: Shpallim Gardën Revolucionare organizatë terroriste

Në Kuvend Irani u shpall sot shtet terrorist me votat e socialistëve, pasi opozita bojkotoi seancën, çka ishte paralajmëruar dje nga kreu i grupit të PD Gazment Bardhi.

Në një reagim zyrtar, Partia Demokratike shpall Gardën Revolucionare të regjimit diktatorial të Teheranit si organizatë terroriste.

“Ajo e cilëson shtetin obskurantist të Ajatollahëve si sponsorin kryesor të terrorizmit në botë dhe një kërcënim madhor për paqen dhe stabilitetin në Lindjen e Mesme dhe kudo në glob”, thuhet në reagim.

Deklaratë e Partisë Demokratike të Shqipërisë:

Partia Demokratike e Shqipërisë shpall Gardën Revolucionare të regjimit diktatorial të Teheranit si organizatë terroriste. Ajo e cilëson shtetin obskurantist të Ajatollahëve si sponsorin kryesor të terrorizmit në botë dhe një kërcënim madhor për paqen dhe stabilitetin në Lindjen e Mesme dhe kudo në glob.

Partia Demokratike mbështet përpjekjet e SHBA-së dhe Izraelit për përmbysjen e diktaturës mizore teokratike të Ajatollahëve dhe zëvendësimin e këtij regjimi me një qeveri të zgjedhur nga populli si një kontribut madhor për çlirimin e popullit iranian, si dhe për garantimin e paqes dhe stabilitetit në rajon e më gjerë.

Fraksion.com