Petro Koçi: Refuzimi i kërkesës së SPAK për arrestimin e Ballukut, “hap prapa” për sundimin e ligjit
Ish-deputeti i Partisë Socialiste, Petro Koçi, e ka cilësuar si një “hap prapa” për procesin politik dhe sundimin e ligjit vendimin e Kuvendit për të mos dhënë autorizimin për masë sigurimi ndaj deputetes Belinda Balluku nën ndjekje penale.
Në një reagim publik, Koçi shkruan se situata nuk përbën “fundin e botës” dhe as një moment të favorshëm për opozitën, por sipas tij vendimi i sotëm dëmton procesin e forcimit të drejtësisë.
“Nuk është fundi i botës dhe as kohë e dielltë për opozitën berishiane, por vendimi i sotëm i refuzimit të kërkesës së SPAK për lejen e Kuvendit për masë sigurimi ndaj një deputeteje nën ndjekje penale përbën një hap prapa për procesin politik dhe sundimin e ligjit në Shqipëri,” shprehet ai.
Ish-deputeti socialist shton se ndërhyrjet selektive të politikës për të mbrojtur individë të caktuar nga ndjekja penale rrezikojnë të dëmtojnë besueshmërinë e angazhimit për drejtësinë. “Ndërhyrja selektive e politikës së ditës në mbrojtje të individëve të caktuar të saj ndaj ndjekjes penale, opozita në rastin Berisha apo maxhoranca në rastin Balluku, e kompromenton angazhimin publik dhe parimor të klasës politike për të respektuar drejtësinë e re në luftën ndaj korrupsionit dhe krimit të organizuar,” përfundon Koçi.
Fraksion.com
