Mojtaba Khamenei zgjidhet udhëheqësi i ri suprem i Iranit

Vendimi është marrë nga “Asambleja e Ekspertëve”, organi kushtetues që ka kompetencën për të emëruar liderin suprem të Republikës Islamike. Ky institucion përbëhet nga klerikë të zgjedhur dhe është përgjegjës për mbikëqyrjen dhe përzgjedhjen e udhëheqësit më të lartë politik dhe fetar të vendit.

Mojtaba Khamenei konsiderohej prej vitesh një figurë me ndikim të madh prapa skenave në strukturat e pushtetit në Iran, veçanërisht në raport me Gardën Revolucionare Islamike të Iranit. Megjithëse nuk ka mbajtur poste të larta publike, ai ka pasur rol të rëndësishëm në rrethin e ngushtë të pushtetit.

Me këtë vendim, për herë të parë në historinë e Republikës Islamike, posti i liderit suprem kalon nga babai te djali, një zhvillim që pritet të ngjallë debat brenda dhe jashtë vendit mbi karakterin e sistemit politik iranian.

Në hierarkinë e Iranit, lideri suprem është autoriteti më i lartë i shtetit dhe kontrollon institucionet kryesore, përfshirë forcat e armatosura, sistemin gjyqësor dhe politikat strategjike të vendit.