Vota e Berishës dhe Topallit kundër shkarkimit të Spiropalit, reagon ish-kryetarja e Kuvendit: E bëra gabimisht, po kërkoja fjalën
Parlamenti votoi me 83 vota pro dhe 2 kundër shkarkimin e Elisa Spiropalit si ministre e Jashtme. Ajo që ra në sy gjatë votimit ishte vota kundër e fiksuar në tabelën elektronike e Jozefina Topallit dhe Sali Berishës.
Kreu i PD-së gjatë procesit të votimit ishte në foltoren e Kuvendit ku po kërkonte të merrte fjalën.
Deputetja e PD, Jozefina Topalli ka sqaruar se ka ndodhur një gabim në momentin e votimit në Parlament, për shkarkimin nga detyra e ministrjes së Jashtme, Elisa Spiropali. Ajo ka sqaruar se në kohën kur foltorja ishte e bllokuar nga opozita, ka qenë ajo që ka shtypur gabimisht dy butona në sistem, për të marrë fjalën.
Lidhur me procesin e votimit, Jozefina Topalli thotë se vota kundër ka qenë një lapsus pasi ajo e kishte shtypur elektronikën për të kërkuar fjalën.
“Në momentin e kaosit në Parlament, kur opozitës nuk po i jepej fjala, kam shtypur gabimisht dy butonat në sistem për të marrë fjalën. Kjo ka përkuar rastësisht me momentin e votimit për shkarkimin e një ministri. Bëhet fjalë për një lapsus teknik dhe jo për shprehje të vullnetit tim politik. Sqaroj gjithashtu se në atë moment z. Berisha ishte në foltore dhe nuk ka votuar”, thotë Topalli.
Fraksion.com
