“250 milionë euro investime për evitimin e përmbytjeve”, Rama: Qeveria do të përmbushë çdo detyrim ndaj qytetarëve

Kryeministri Edi Rama garantoi sot mbështetje të plotë për qytetarët e prekur nga situata e përmbytjeve, duke theksuar se qeveria do të përmbushë çdo detyrim ndaj tyre, si për banesat ashtu edhe për gjënë e gjallë.

Rama kujtoi se kur qeveria aktuale mori detyrën, trashëgoi borxhe të shumta nga përmbytjet, veçanërisht në zonën e Shkodrës, të cilat sipas tij janë shlyer një e nga një. Sipas tij, përmirësimi i infrastrukturës mbrojtëse ka ndikuar që dëmet nga përmbytjet të jenë më të pakta, pavarësisht përkeqësimit të sfidave klimatike.

“Kur ne erdhëm në qeveri, në malin e borxheve që na lanë trashëgimia aleatët e shiut ishte edhe një pjesë të tërë borxhesh nga përmbytjet zonës së Shkodrës. Në i shlyem një më një ato borxhe dhe nuk kemi hyrë më në asnjë borxh të kësaj natyre me njerëzit, përkundrazi kemi përballuar me dinjitet njerëzor, shtetëror dhe politik jo vetëm detyrimet nga përmbytjet, që edhe pse sfidat e klimës janë bërë më të mprehta, kanë qenë sidoqoftë shumë më pak pikërisht sepse ne kemi rritur ndjeshëm aftësinë mbrojtëse të infrastrukturës sonë, apo detyrimet nga zjarret që janë një sfidë e rritur e viteve të fundit, por edhe detyrime marramendëse nga fatkeqësi si pandemia apo tërmeti, duke dalë më të fortë se para fatkeqësive e më të ditur për të përballura sfidat e së nesërme.

“Sot dua t’i siguroj edhe të dëmtuarit e kësaj herë se ne do t’i qëndrojmë me të njëjtin dinjitet njerëzor shtetëror dhe politik çdo detyrimi ndaj tyre qoftë për banesat, qoftë për gjënë e gjallë”, tha Rama.

Gjatë mbledhjes së Komitetin Ndërministror të Emergjencave Civile për të adresuar situatën e krijuar nga përmbytjet e ditëve të fundit, si pasojë e reshjeve intensive të shiut, Rama theksoi se puna intensive dhe mobilizimi në gjithë territorin do të vijojë pa u ndalur.

“Dua të theksoj se puna intensive dhe mobilizimi i pandalur 24 orë në të gjithë territorin ku është nevoja e të gjithash strukturave të shtetit si edhe bashkive, do të vazhdojë e pandërprerë deri në kapërcimin e kësaj situate të rënduar meteorologjike”, tha Rama.

Në fund, Rama u bëri thirrje deputetëve të shumicës qeverisëse që të jenë të pranishëm pranë qytetarëve edhe pas kalimit të situatës së vështirë.

“Nga ana tjetër dua t’u them të gjithë deputetëve të shumicës qeverisës të pranishëm në këtë mbledhje përmes zoom-it që të jenë të angazhuar edhe sot edhe nesër, edhe pasi momenti i vështirë të jetë kapërcyer pranë njerëzve me njerëzit dhe për njerëzit”, tha Rama.

Rama bëri të ditur sot se gjatë dekadës së fundit janë investuar 250 milionë euro në infrastrukturën e kullimit dhe forcimit të argjinaturave.

Në mbledhjen e Komiteti Ndërministror i Emergjencave Civile, kryeministri u ndal te investimet e kryera si dhe për transformimin e Emergjencave Civile.

“E gjithë kjo infrastrukturë ka funksionuar dhe ka përballuar sasitë e reshjeve sipas niveleve të sigurisë për të cilat janë projektuar, përtej të cilave është rasti i reshjeve tejet anormale të këtyre ditëve. Përmbytja e disa zona më vulnerabël për arsye tejet objektive është e pashmangshme në cilindo vend të planetit”, tha Rama.

Kryeministri bëri të ditur se prej vitesh tanimë kemi një proces mirëmbajtje të infrastrukturës së kullimit.

“Përveç remontit të plotë të 27 hidrovoreve gjatë sezonit të verës largohen çdo vit rreth 2.5 milionë m3 kub llumra dhe mbetje nga kanalet kryesore kulluese me një gjatësi rreth 300 km”, tha Rama.

Vetëm vitin e shkuar, sipas tij, janë investuar për këtë infrastrukturë të kullimit afër 25 milionë euro.

“Ndërkohë që këtë vit vetëm nga bashkitë do të investohen 11 milionë euro, apo 8% më shumë se në vitin e shkuar”, shtoi kryeministri.

Kreu i qeverisë theksoi se investimet prej afro 250 milionë euro në dekadën e fundit kanë rindërtuar 536 kanale ujitëse dhe kullimi që ishin faktikisht thuajse të përgjysmuara.

“Këto investime kanë përforcuar masivisht argjinaturat që binin nga të katër anët; kanë futur në punë 12 hidrovore që kishin reshtur së punuari prej vitesh; kanë rritur sigurinë e 44 digave dhe kanë shtuar ndjeshëm flotën e eskavatorëve edh enë nivelin vendor”, tha Rama.

Përtej këtyre investimeve, Kryeministri konsideroi investimin më madhor atë në transformimin e emergjencave civile.

“Nga trupa pa kokë në koordinim, pa bazë materiale dhe të veshur si mos më keq janë transformuar në trupa që vihen në lëvizje kur paralajmërohet furtuna. Ka mësime për të nxjerrë dhe boshllëqe për t’u mbushur por nëse reshjet e pazakonta ranë dhe përmbytën njësoj vende të rajonit tonë Shqipëria nuk reagoi njësoj si dikur kur edhe një shi i zakonshëm bënte ujë dynjanë”, shtoi Rama.

 

Fraksion.com