U mbyt në Shumbin: 55-vjeçarja me probleme të shëndetit mendor. Zbardhet dinamika e ngjarjes, gruaja u hodh në rrjedhën e lumit

Janë zbardhur detaje të reja mbi ngjarjen tragjike në zonën e Mengelit, ku një grua 55-vjeçare humbi jetën pasi u mbyt në lumin Shkumbin.

Sipas informacioneve, disa banorë të zonës kanë vënë re një grua që dyshohej se vuante probleme të shëndetit mendor, e cila po vraponte përgjatë rrugës duke rrezikuar jetën.

Sipas asaj që raportohet gruaja u vetëhodh në rrjedhën e lumit Shkumbin. Efektivët u futën menjëherë në lumë për ta shpëtuar, por rryma e fortë e lumit e rrëmbeu, duke e bërë të pamundur nxjerrjen e menjëhershme të saj.

Menjëherë u aktivizuan forca të shumta policore, ndërsa kërkimet u mbështetën edhe me dron dhe u bashkuan nga specialistë të kërkim-shpëtimit, me mjete të posaçme për operacione në terren të vështirë.

Pas rreth një ore e gjysmë kërkimesh, trupi i pajetë i gruas u gjet në një distancë nga vendi ku ishte parë për herë të fundit.

“Rreth orës 17:30, në lumin Shkumbin, është gjetur e pajetë, dyshohet e mbytur në lumë, shtetasja D. B., rreth 55 vjeçe. Kjo shtetase ishte e strehuar në një qendër sociale dhe vuante nga probleme të shëndetit mendor. Ajo ishte larguar nga qendra rreth orës 15:00 të ditës së sotme”,- njoftoi Policia.

Fraksion.com