I dënuar me 35 vite burg, por ndodhej në liri, Bertil Alliaj zbrazi drejt kushëririt 6 plumba. Autori në arrati, ndërhyrja e FNSH

Bertil Alliaj është autori i dyshuar për vrasjen e kushëririt të tij Dalan Alliaj 36-vjeç mbrëmjen e së premtes në fshatin Gjorm të Vlorës.

Viktima u qëllua me 6 plumba, një prej të cilëve më pranë zemrës.

Kontrollet janë shtrirë në vargmalet e fshatit Gjorm si dhe janë ngritur pika kontrolli deri në Selenicë, pasi autori i dyshuar  është njohës i mirë i zonës.

Nuk dihen akoma shkaqet  e kësaj vrasje, pasi nëse do të ishte i mirëorganizuar, autori do të kishte një makinë me të cilën do të largohej dhe më pas do ta digjte makinën.

Policia njoftoi më herët se nga veprimet e para hetimore është bërë e mundur identifikimi i autorit të dyshuar të ngjarjes, shtetasit Bertil Alliaj  i cili dyshohet se në fshatin Gjorm ka vrarë me armë zjarri kushëririn e tij, shtetasin D. A.

Pas kryerjes së krimit, shtetasi Bertil Alliaj është larguar drejt zonës malore përreth, ku dyshohet se fshihet.

Strukturat e Drejtorisë Vendore të Policisë Vlorë po vijojnë punën intensive për lokalizimin dhe kapjen e autorit të dyshuar, ndërsa nën drejtimin e Prokurorisë vijojnë veprimet hetimore për dokumentimin e plotë të ngjarjes.

Forcat e rendit, FNSH  bashku me ekspertët e kriminalistikës, kanë bërë këqyrjen e vendngjarjes dhe kanë shoqëruar për në polici pesë persona, përfshirë djalin e xhaxhait (ndërkohë në kërkim është shpallur një tjetër djalë xhaxhai i viktimës) i cili ka qenë me 36-vjeçarin, kryeplakun e fshatit, dhe tre banorë të tjerë, që mund të kenë dijeni për ngjarjen.

Policia e Vlorës dhe forcat e FNSH janë duke krehur zonën për kapjen e autorit, ndërkohë që nga këqyrja e trupit te 36 vjeçarit janë gjetur gjashtë shenja plumbash të cilat i kanë marrë jetën. Trupi i pajetë i të ndjerit është dërguar në morgun e spitalit të Vlorës, ku kanë mbërritur edhe familjarë të shumtë të viktimës.

Viktima kishte një biznes në fshatin Levan të Fierit, dhe rezulton pa precedentë penalë.

Fraksion.com