Rutte: NATO mbështet Lituaninë për ndërhyrjen me balonat
NATO shprehu mbështetje të fortë për Lituaninë të martën për atë që Vilnius e dënoi si një “sulm hibrid” në hapësirën e saj ajrore nga aleati i Rusisë, Bjellorusia, që përfshinte balona të mbushura me cigare kontrabandë.
Sekretari i Përgjithshëm i aleancës, Mark Rutte, tha se kishte folur me Presidentin lituanez, Gitanas Nauseda, në lidhje me incidentin, në të cilin dhjetëra balona detyruan mbylljen e përkohshme të dy aeroporteve javën e kaluar.
“NATO mbështet fuqishëm Lituaninë – duke përfshirë edhe policimin ajror që aktualisht ofrohet nga Spanja dhe Hungaria, si dhe forcat e NATO-s të udhëhequra nga Gjermania”, shkroi Rutte në X.
Lituania, një anëtare e NATO-s dhe Bashkimit Evropian, mbylli gjithashtu dy pikat e fundit kufitare me Bjellorusinë fqinje për shkak të incidentit.
Shefja e BE-së, Ursula von der Leyen, e quajti incidentin me balonat “një kërcënim hibrid” dhe tha se Bashkimi Evropian mbështeti Lituaninë.
“Ky është destabilizim. Ky është provokim”, tha ajo në X, duke shtuar se Evropa duhet të përshpejtojë masat për të mbrojtur krahun e saj lindor.
Ushtria lituaneze tani është autorizuar të rrëzojë balona të tilla, u tha gazetarëve të hënën kryeministrja Inga Ruginiene.
Ajo tha se mungesa e veprimeve të Bjellorusisë për të ndaluar ata që janë përgjegjës për balonat e bëri të besonte se autoritetet ishin të përfshira.
Duhani i tregut të zi është një burim të ardhurash për qeverinë e Presidentit bjellorus Alexander Lukashenko, sipas opozitës së vendit.
Ministri i Jashtëm bjellorus Maxim Ryzhenkov i hodhi poshtë akuzat e Lituanisë, duke i quajtur ato një “provokim” që synonte të justifikonte “masat kundër Bjellorusisë (dhe) kundër Rusisë”.
Fraksion.com
