Moska: Kievi po planifikon të provokojë NATO-n për të nisur luftën. Në Poloni arrestohet një ukrainas
Shërbimi i Inteligjencës së Jashtme i Rusisë (SVR) ka akuzuar shërbimet ukrainase për përgatitjen e një “provokimi sensacional” në territorin e Polonisë, i cili sipas Moskës do të përfshinte një sulm komando dhe përdorim të dronëve ndaj infrastrukturës kritike.
Sipas deklaratës së cituar nga agjencia TASS, synimi i këtyre veprimeve është që t’i atribuohet përgjegjësia Rusisë dhe Bjellorusisë, duke tentuar kështu të përfshijë NATO-n drejtpërdrejt në luftën në Ukrainë. SVR pretendon se në këtë operacion do të përfshiheshin edhe luftëtarë nga grupe të armatosura të lidhura me Kievin, përfshirë Legjionin e Lirisë së Rusisë dhe Regjimentin K.
Ndërkohë, zhvillime të tjera shtojnë tensionin. Sky News raporton se në Poloni është arrestuar një shtetas ukrainas i kërkuar nga Gjermania për përfshirjen në shpërthimet e gazsjellësit Nord Stream në vitin 2022.
Sistemi Nord Stream, i përbërë nga NS1 dhe NS2, transportonte gaz nga Rusia drejt Gjermanisë përmes Detit Baltik. Pas shpërthimeve, vetëm një tubacion i NS2 mbeti i paprekur, ndërsa incidenti u pa si një përshkallëzim i madh i konfliktit në Ukrainë dhe një goditje për sigurinë energjetike të Europës.
Një raport i inteligjencës amerikane i vitit 2023 sugjeronte se pas sulmit qëndronte një grup pro-ukrainas, megjithatë asnjë organizatë nuk ka marrë përgjegjësinë zyrtare për shpërthimet.
Fraksion.com
