“Takimi i Arubës përcillet në heshtje varri nga Edi Rama dhe narkoministrat e tij. Ai po përpiqet ta arkivojë në harresë, por kjo nuk do të ndodhë,” tha Berisha para gazetarëve.
Duke e konsideruar Arubën si një “moment kritik në përforcimin e narkoshtetit shqiptar”, Berisha tha se opozita është “totalisht e përkushtuar për transparencë të plotë”, duke akuzuar Ramën se ka bërë marrëveshje me kartele të drogës për të shndërruar Shqipërinë në një parajsë për paratë e krimit.

Berisha vijoi më tej duke e krahasuar rolin e kryeministrit shqiptar me atë të presidentit venezuelian Nicolas Maduro, duke thënë se Rama është bërë “kryetari i parë i një narkoshteti në Europë”.

Në vijim, kreu i opozitës përmendi edhe reagime ndërkombëtare ndaj krimit të organizuar, duke përshëndetur vendimin e presidentit amerikan Donald Trump për t’i shpallur kartelet e drogës organizata terroriste, si dhe masat e marra nga presidenti i Francës, që sipas tij, ka aktivizuar njësitë speciale të ushtrisë për të luftuar grupet kriminale.

“Këto zhvillime tregojnë se kartelet e drogës dhe organizatat kriminale përbëjnë rrezik madhor për sigurinë e vendeve dhe paqen në botë. Shqipëria nuk mund të qëndrojë jashtë këtij alarmi,” përfundoi Berisha.