“Konferencën e Sigurisë në Sarajevë”, Shekerinska: Siguria dhe stabiliteti i Bosnjë dhe Hercegovinës kanë rëndësi për të gjithë rajonin
Të premten, më 26 dhe të shtunën, më 27 shtator, Zëvendës Sekretarja e Përgjithshme e NATO-s, Radmila Shekerinska vizitoi Sarajevën, Bosnjë dhe Hercegovinë (BiH), ku u angazhua në takime të nivelit të lartë dhe mori pjesë në Konferencën e Sigurisë në Sarajevë.
Ndër angazhime të tjera, Zëvendës Sekretarja e Përgjithshme u takua me përfaqësues të Presidencës së BiH për të diskutuar situatën aktuale në vend. Ajo riafirmoi angazhimin e NATO-s ndaj sovranitetit, integritetit territorial, rendit kushtetues dhe institucioneve në nivel shtetëror të Bosnjës dhe Hercegovinës. Znj. Shekerinska nënvizoi gjithashtu mbështetjen e NATO-s për Operacionin Althea të udhëhequr nga BE-ja, duke përsëritur se nuk do të lejohet të krijohet një boshllëk sigurie në Bosnjë dhe Hercegovinë.
ZëvendësSekretarja e Përgjithshme vazhdoi të takohej me anëtarët e Komisionit të Përbashkët për Mbrojtje dhe Siguri të Bosnjë dhe Hercegovinës, si dhe me delegacionin e saj në Asamblenë Parlamentare të NATO-s. Znj. Shekerinska zhvilloi gjithashtu bisedime dypalëshe me Komandantin e EUFOR-it, Gjeneral Major Florin-Marian Barbu, Përfaqësuesin e Lartë për Bosnjë dhe Hercegovinën, Christian Schmidt dhe Zëvendësministrin në Ministrinë e Punëve të Jashtme, Josip Brkic. Përveç kësaj, ajo kaloi kohë me studentët që morën pjesë në një stërvitje simulimi të NAC, të organizuar nga Komanda Aleate e NATO-s për Transformim (ACT) përpara një fjalimi kryesor në hapjen e Konferencës së Sigurisë në Sarajevë.
“Siguria dhe stabiliteti i Bosnjë dhe Hercegovinës kanë rëndësi për të gjithë këtë rajon. Ka rëndësi për Evropën dhe sigurisht që ka shumë rëndësi edhe për NATO-n”, tha znj. Shekerinska. “Ndërsa lufta përcaktoi të kaluarën e këtij vendi – dhe të këtij rajoni – ajo nuk përcakton të tashmen e tij dhe nuk duhet të përcaktojë të ardhmen e tij”, vazhdoi ajo, duke pohuar se “një e ardhme paqeje, prosperiteti dhe rritjeje ekonomike – kjo është ajo që meriton ky vend”.
Fraksion.com
