Reaktori bërthamor i shënjestruar nga Izraeli përdoret për qëllime ‘shëndetësore dhe mjekësore’ – agjencia e energjisë atomike e Iranit

Irani ka thënë se një reaktor bërthamor i cili u shënjestrua nga një sulm izraelit do të përdorej për qëllime ‘shëndetësore dhe mjekësore’.
Izraeli tha se bombardoi reaktorin me ujë të rëndë në Arak në Iranin qendror, i cili ishte në ndërtim e sipër, të enjten për të ndaluar përdorimin e tij për “zhvillimin e armëve bërthamore”.
Kreu i Organizatës së Energjisë Atomike të Iranit (AEOI), Mohammad Eslami, tani ka akuzuar Izraelin për shënjestrimin e një “qendre që vepron për kërkime radiofarmaceutike me produktet e përdorura në fushat e shëndetit dhe mjekësisë”.
Eslami shtoi se Irani “nuk u beson më” inspektimeve të Agjencisë Ndërkombëtare të Energjisë Atomike (IAEA) sepse ai thotë se të gjitha inspektimet e saj “janë përdorur për spiunazh në emër” të Izraelit.

Eslami kishte thënë më parë se Teherani do të ndjekë veprime ligjore kundër IAEA-së për “mosveprimin” e saj lidhur me synimin e Izraelit ndaj vendeve bërthamore iraniane.
Ai shtoi se asnjë nga sulmet e fundit izraelite nuk ka çuar në ndonjë rrjedhje radioaktive, prandaj “nuk ka shkak për shqetësim publik”.
Më parë, kreu i IAEA-së, Rafael Grossi, tha se sulmet e Izraelit ndaj objekteve bërthamore iraniane kanë çuar në disa rrjedhje radiologjike. Aktualisht “nuk ka rrezik për publikun”, por Grossi tha se “mbetet një rrezik që kjo të ndodhë ende”.

Fraksion.com