Qëlloi gardianin e burgut të Fierit bashkë me disa të tjerë! Arrestohet 32-vjeçari, dënuar më parë për vrasje dhe armëmbajtje pa leje
Policia e Fierit ka arrestuar një 32-vjeçar me precedentë penalë të mëparshëm, i cili ishte në kërkim për sulm ndaj një punonjësi të IEVP Fier. Ngjarja kishte ndodhur më 11 mars 2025, kur gardiani u godit me grushte nga disa persona për shkak të detyrës.
I arrestuari, Marteos Pasho, banues në Patos, rezulton i dënuar më parë për vrasje dhe armëmbajtje pa leje. Sipas autoriteteve, ai është një nga autorët e dyshuar që, në bashkëpunim me shtetasit A. M., E. N. dhe E. R., ka goditur punonjësin e burgut.
Njoftimi i policisë:
I ndaluari, i dënuar më parë për vrasje dhe armëmbajtje pa leje.
Në vijim të kontrolleve të mbështetura te informacionet e siguruara në rrugë operative, me qëllim ndalimin e shtetasve të implikuar në rastin e datës 11.03.2025, kur u godit me grushte, për shkak të detyrës, një punonjës i IEVP Fier, shërbimet e Policisë së Fierit kapën njërin prej autorëve të dyshuar, shtetasin M. P., 32 vjeç, banues në Patos.
Në muajin mars 2025, Gjykata e Fierit i ka caktuar masën e sigurisë “Arrest në burg”, për veprën penale “Goditja për shkak të detyrës”, kryer në bashkëpunim.
32-vjeçari akuzohet se në bashkëpunim me shtetasit A. M., E. N. dhe E. R., ka goditur me grushte, për shkak të detyrës, një punonjës të IEVP Fier. Punohet për kapjen e 3 shtetasve të shpallur në kërkim.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
Fraksion.com
