Irani u kërkon njerëzve të fshijnë WhatsApp nga pajisjet e tyre
Televizioni shtetëror iranian të martën pasdite u bëri thirrje njerëzve të heqin WhatsApp nga telefonat e tyre inteligjentë, duke pretenduar pa prova specifike se aplikacioni i mesazheve mblodhi informacionin e përdoruesve për t’ia dërguar Izraelit.
Në një deklaratë, WhatsApp tha se ishte “i shqetësuar se këto raportime të rreme do të jenë një justifikim që shërbimet tona të bllokohen në një kohë kur njerëzit kanë më shumë nevojë për to”. WhatsApp përdor enkriptim nga fillimi në fund, që do të thotë se një ofrues shërbimi në mes nuk mund të lexojë një mesazh.
“Ne nuk e gjurmojmë vendndodhjen tuaj të saktë, nuk mbajmë regjistra se kujt i dërgojnë mesazhe të gjithë dhe nuk gjurmojmë mesazhet personale që njerëzit i dërgojnë njëri-tjetrit”, shtoi ai. “Ne nuk u ofrojmë informacione masive asnjë qeverie.”
Enkriptimi nga fillimi në fund do të thotë që mesazhet janë të koduara në mënyrë që vetëm dërguesi dhe marrësi t’i shohin ato. Nëse dikush tjetër e kap mesazhin, e tëra çfarë do të shohin është një ngatërresë që nuk mund të dekodifikohet pa çelësin.
Gregory Falco, një profesor asistent i inxhinierisë në Universitetin Cornell dhe ekspert i sigurisë kibernetike, tha se është demonstruar se është e mundur të kuptohen meta të dhënat rreth WhatsApp që nuk enkriptohen.
“Pra, ju mund të kuptoni gjëra rreth mënyrës se si njerëzit po e përdorin aplikacionin dhe ky ka qenë një problem i vazhdueshëm ku njerëzit nuk kanë qenë të interesuar të angazhohen me WhatsApp për këtë (arsye)”, tha ai.
Një problem tjetër është sovraniteti i të dhënave, shtoi Falco, ku qendrat e të dhënave që strehojnë të dhëna të WhatsApp nga një vend i caktuar nuk ndodhen domosdoshmërisht në atë vend. Është më se e realizueshme, për shembull, që të dhënat e WhatsApp nga Irani të mos strehohen në Iran.
“Vendet duhet të strehojnë të dhënat e tyre brenda vendit dhe t’i përpunojnë të dhënat brenda vendit me algoritmet e tyre. Sepse është shumë e vështirë gjithnjë e më shumë të besosh në rrjetin global të infrastrukturës së të dhënave”, tha ai.
WhatsApp është në pronësi të Meta Platforms, kompanisë mëmë të Facebook dhe Instagram.
Irani ka bllokuar qasjen në platforma të ndryshme të mediave sociale gjatë viteve, por shumë njerëz në vend përdorin proxy dhe rrjete private virtuale, ose VPN, për t’i aksesuar ato. Ai ndaloi WhatsApp dhe Google Play në vitin 2022 gjatë protestave masive kundër qeverisë për vdekjen e një gruaje të mbajtur nga policia e moralit të vendit. Ky ndalim u hoq në fund të vitit të kaluar.
WhatsApp kishte qenë një nga aplikacionet më të njohura të mesazheve në Iran, përveç Instagram dhe Telegram.
Fraksion.com
